Drejtori i Komunikimeve i Türkiyes, Burhanettin Duran tha se përdorimi nga kryeministri izraelit Benjamin Netanyahu i foltores së Asamblesë së Përgjithshme të OKB-së për të bërë "akuza të pabaza" ndaj Türkiyes dhe presidentit Recep Tayyip Erdoğan është i papajtueshëm me "idealet e paqes, ligjit dhe dialogut" që përfaqëson OKB-ja.
Në një deklaratë në platformën sociale turke NSosyal, Duran iu referua urdhërarrestit të Gjykatës Ndërkombëtare Penale ndaj Netanyahut, të lëshuar për krime të dyshuara lufte dhe krime kundër njerëzimit në Rripin e Gazës, dhe kritikoi deklaratat e tij që kishin në shënjestër Erdoğanin.
Duran tha se deklaratat e Netanyahut kundër Erdoğanit nuk mund t'i "bëjnë të padukshme masakrat e tij, katastrofën humanitare në Gaza dhe procedurat para drejtësisë ndërkombëtare".
"Edhe komuniteti ndërkombëtar po e sheh këtë situatë dhe Netanyahu është më i izoluar se kurrë më parë", shkroi ai.
"Nën udhëheqjen e presidentit tonë, Türkiye do të vazhdojë të mbrojë të drejtat e të shtypurve, përfshirë vëllezërit dhe motrat tona palestineze, një botë më të drejtë dhe paqen si dhe të qëndrojë kundër padrejtësisë dhe shtypjes", shtoi Duran.
