Türkiye eksporton 80 milionë lule në 35 vende për Ditën Ndërkombëtare të Gruas

Türkiye eksportoi rreth 80 milionë lule në 35 vende, kryesisht në Holandë dhe Mbretërinë e Bashkuar, për Ditën Ndërkombëtare të Gruas më 8 Mars.

Serat në qytetin jugperëndimor të Antalias po shohin një aktivitet të stuhishëm për shkak të prodhimit intensiv të luleve të prera për këtë rast.

Lulet e prera, të cilat janë lule të freskëta që shpesh priten me kërcell dhe gjethe, paketohen në depo në Antalia për t'u dërguar në të gjithë botën.

Këto lule përfshijnë kryesisht karafil dhe zymbyla.

Ismail Yilmaz, kryetar i Shoqatës së Eksportuesve të Bimëve dhe Produkteve Zbukuruese, i tha Anadolu se dërgesat për Ditën Ndërkombëtare të Gruas janë drejt përfundimit, ndërsa serrat përgatisin porositë e fundit.

Yilmaz deklaroi se sektori turk i luleve të prera ishte më aktiv këtë vit krahasuar me vitin e kaluar, me një rritje prej 15% të porosive.

"Vitin e kaluar, ne eksportuam lule me vlerë 9 milionë dollarë për Ditën Ndërkombëtare të Gruas, dhe këtë vit kemi bërë një xhiro prej rreth 12 milionë dollarësh," tha ai.

“Holanda është tregu ynë më i rëndësishëm, e ndjekur nga Mbretëria e Bashkuar - ne gjithashtu bëmë dërgesa në vende si Gjermania, Rumania dhe Bullgaria, dhe madje edhe në Ukrainë dhe Rusi pavarësisht luftës”, shtoi ai.

Ai vuri në dukje se tregu evropian porositi lule me ngjyra pastel për këtë vit, por pati disa porosi të konsiderueshme për lule të kuqe dhe të bardha.

Ai përmendi se rreth 15.000 hektarë tokë u përdorën për kultivim në këtë sektor, i cili siguron vende pune për 100.000 punëtorë drejtpërdrejt dhe 300.000 punëtorë tërthorazi, ndërsa gratë përbëjnë 80% të sektorit turk të luleve.