Panairi i 63-të Ndërkombëtar i Damaskut nis të martën në kryeqytetin sirian, duke ofruar mundësi për investime të përbashkëta dhe prodhim vendas për Türkiyen dhe Sirinë, tha për Anadolu ministri turk i Tregtisë, Ömer Bolat.
Bolat tha se biznesmenë nga të dyja vendet do të mblidhen në një tryezë të rrumbullakët në këtë ngjarje, ku vitin e kaluar morën pjesë më shumë se 800 kompani nga 44 vende dhe rreth 2 milionë vizitorë.
Ai tha se vëllimi tregtar mes Türkiyes dhe Sirisë arriti në 3,7 miliardë dollarë vitin e kaluar, ndërsa në janar-korrik të këtij viti u rrit me mbi 16 për qind në bazë vjetore, duke arritur në 2,2 miliardë dollarë.
“Vëllimi ynë tregtar u rrit me mbi 16 për qind në bazë vjetore në janar-korrik të këtij viti, duke arritur në 2,2 miliardë dollarë, diçka që e konsiderojmë jashtëzakonisht të vlefshme për të ardhmen e marrëdhënieve tona ekonomike dhe tregtare”, tha ai.
Bolat tha se Türkiyes i është caktuar një hapësirë prej 120 metrash katrorë në panairin e këtij viti, ku do të promovohen produkte vendase dhe do të zhvillohen aktivitete kulturore.
“Ne i kushtojmë shumë rëndësi krijimit të një baze gjithëpërfshirëse dhe të qëndrueshme për marrëdhëniet tona me Sirinë, duke e mbështetur njëra-tjetrën në tregti, investime, kontakte institucionale dhe ndërveprime mes popujve”, tha ai.
“Ne besojmë se kompanitë turke dhe siriane mund të eksplorojnë së bashku mundësi të rëndësishme në një gamë shumë të gjerë sektorësh, nga infrastruktura dhe superstruktura te ndërtimi, nga energjia te logjistika, ushqimi dhe tekstilet, makineritë, kimia, shëndetësia dhe teknologjia”, tha ai.
Bolat tha se Ankara synon ta rrisë vëllimin tregtar me Sirinë në 10 miliardë dollarë, duke shfrytëzuar afërsinë gjeografike, kapacitetet prodhuese dhe logjistike të Turqisë dhe përvojën e sektorit privat në tregjet rajonale.
“Bashkëpunimi ekonomik i qëndrueshëm dhe i vërtetë shkon përtej shitjes dhe blerjes së mallrave; ai përfshin prodhimin së bashku, investimin, shkëmbimin e teknologjisë dhe ekspertizës dhe zgjerimin e përbashkët në tregje të reja”, tha ai.
