Ushtria e Iranit deklaroi të enjten se kishte kryer sulme ndaj radarëve dhe sistemeve amerikane të mbrojtjes ajrore në Kuvajt dhe Bahrein, në kuadër të fazës së dhjetë të fushatës së saj hakmarrëse, të njohur si Operacioni “Rrufeja”.

Sipas një deklarate të transmetuar nga agjencia iraniane Fars, ushtria tha se kishte goditur sisteme radarësh, bateri të mbrojtjes ajrore Patriot dhe depozita karburanti të përdorura nga forcat amerikane në bazën ajrore Ali Al Salem në Kuvajt.

Në një operacion të veçantë, ushtria iraniane tha se dronët kishin shënjestruar infrastrukturën amerikane të komunikimit dhe radarëve, përfshirë sistemet e radarëve Super Hawk dhe instalimet Patriot, në bazën ajrore Sheikh Isa në Bahrein.

Më herët, edhe Garda Revolucionare Islamike e Iranit mori përgjegjësinë për sulmet në Kuvajt, duke deklaruar se kishte shënjestruar një radar të paralajmërimit të hershëm C-RAM dhe një zonë grumbullimi të personelit amerikan në bazën ajrore Ali Al Salem.

Deklarata vjen në një kohë tensionesh në rritje mes ShBA-së dhe Iranit lidhur me Ngushticën e Hormuzit, ndërsa të dyja palët vazhdojnë shkëmbimin e sulmeve, pavarësisht një memorandumi mirëkuptimi të ndërmjetësuar nga Pakistani, që synon t’i japë fund konfliktit dhe të çojë në një marrëveshje të qëndrueshme paqeje.