Kryeministri në detyrë i Kosovës, Albin Kurti ka thënë se nuk ka as arsye ligjore e as morale që ish-krerët e Ushtrisë Çlirimtare të Kosovës (UÇK), Hashim Thaçi, Kadri Veseli, Jakup Krasniqi e Rexhep Selimi të mbahen edhe më tej në paraburgim nga Gjykata Speciale në Hagë.

Kurti nëpërmjet rrjeteve sociale tha se pesë vjet pas arrestimit të tyre kur tashmë nuk ka dëshmitarë dhe prokuroria e ka përfunduar rastin, krerët e UÇK-së po vazhdojnë të mbahen në burgun e Hagës.

"Më 5 nëntor 2020, Rexhep Selimin e dërguan në burgun e Hagës ku ende po e mbajnë. Përveç tij, edhe Hashim Thaçi, Kadri Veseli dhe Jakup Krasniqi ndodhen në paraburgim tash e pesë vjet. Pesë vite pritje, pesë vite pas hekurave ndërkohë që arsyeja e njëjtë përsëritet në çdo vendim për refuzimin e lirimit: rreziku i ndikimit mbi dëshmitarët", shkroi Kurti.

Ai tha se edhe pse Prokuroria e ka përfunduar rastin dhe dëshmitarë më nuk ka "nuk ka as arsye ligjore, as morale që të mbahen edhe më tej në paraburgim".

"Kështu kam menduar që nga dita e parë. Kemi punuar gjatë dhe me përkushtim për këtë çështje, në heshtje, sepse shpesh puna e mirë bëhet pa zhurmë. Por, ndonjëherë puna që nuk shihet, nuk dihet", theksoi Kurti.

Tutje, ai tha se si kryetar i Lëvizjes Vetëvendosje dhe si deputet, që nga viti 2014 bashkë me Rexhep Selimin kanë paraqitur argumentet dhe qëndrimet kundër kësaj gjykate.

Kurti tha se si kryeministër, bashkë me zyrën e tij, kanë kërkuar lirimin e të të paraburgosurve në Hagë që nga fillimi, ku për këtë publikoi edhe letrën që i ka dërguar në shtator të vitit 2022 kryetares së Gjykatës Speciale, Ekaterina Trendafilova.

"E bëj publike sot për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve të tyre dhe ta mbrojnë në liri luftën e drejtë çlirimtare të Kosovës. Përgjigjja e znj. Trandafilova pas dy javësh që mori letrën nga unë nuk ndryshoi gjë. Kërkesat e paraqitura nuk morën zgjidhje", tha Kurti.

Ai shtoi se në Kosovë ekzistojnë të gjitha garancitë për përgjigje pozitive ndaj tyre.

Ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, ndodhen në paraburgim në Hagë që nga nëntori i vitit 2020, pas konfirmimit të aktakuzave nga Dhomat e Specializuara të Kosovës, të cilat i ngarkojnë ata me krime lufte dhe krime kundër njerëzimit gjatë viteve 1998-1999.

Procesi gjyqësor ndaj tyre ka hyrë në një fazë të avancuar, me Prokurorinë që ka përfunduar paraqitjen e provave dhe dëshmitarëve, ndërsa mbrojtja ka nisur paraqitjen e qëndrimeve të saj. Pavarësisht kësaj, gjykata ka vazhduar të refuzojë kërkesat për lirimin e tyre në procedurë të rregullt, duke u mbështetur kryesisht në argumentin e rrezikut të ndikimit mbi dëshmitarët.