Ministri i ekstremit të djathtë për Sigurinë Kombëtare të Izraelit, Itamar Ben-Gvir, ka bërë thirrje për intensifikimin e sulmeve ajrore në Gaza dhe që Izraeli të vrasë “30 deri në 40” palestinezë në ditë. Ai përsëriti gjithashtu thirrjen për rivendosjen e izraelitëve në enklavën palestineze, në dëm të popullsisë autoktone.

Ben-Gvir, udhëheqës i partisë së ekstremit të djathtë “Fuqia Hebraike”, i bëri këto deklarata në podkastin “October 8”, të drejtuar nga Rom Braslavski, një ish i burgosur izraelit i Hamasit.

Të hënën, “The Jerusalem Post” publikoi pjesë nga intervista, në të cilën Ben-Gvir tha se Izraeli nuk duhet t’i kufizojë sulmet vetëm ndaj atyre që “paraqesin një kërcënim të menjëhershëm”, por kërkoi sulme ajrore në shkallë të gjerë në të gjithë Rripin e Gazës.

Ai tha se disa njerëz “nuk e meritojnë të jetojnë […] ata nuk janë aspak njerëz”.

Ai shtoi se as palestinezët që nuk janë të përfshirë në luftime nuk duhet të kursehen nga sulmet izraelite.

Duke iu referuar një gruaje që i kishte dhënë ushqim Braslavskit gjatë kohës që ai mbahej i burgosur në Gaza, Ben-Gvir e quajti atë “terroriste” që “duhet të marrë një plumb në kokë”.

Braslavski, një ushtar izraelit i kapur më 7 tetor 2023, u lirua më 13 tetor 2025, si pjesë e një shkëmbimi të të burgosurve ndërmjet Hamasit dhe Izraelit.

Thirrje për rivendosjen e kolonive në Gaza

Ben-Gvir përsëriti gjithashtu thirrjen e tij për rithemelimin e kolonive izraelite në Gaza, duke thënë: “Të gjithë Gazën e shoh si tonën”.

Ai shtoi se kolonitë nuk duhet të kufizohen vetëm në ish-bllokun e kolonive Gush Katif, nga i cili Izraeli u tërhoq në vitin 2005, por duhet të shtrihen në të gjithë enklavën.

Ai nxiti gjithashtu banorët palestinezë të Gazës të largohen vullnetarisht nga shtëpitë e tyre stërgjyshore, duke bërë thirrje për “sa më shumë emigrim të jetë e mundur”.

“The Jerusalem Post” citoi Ben-Gvirin të thoshte se Izraeli duhet të vrasë “30 deri në 40 banorë të Gazës gjatë sulmeve çdo natë”, duke shtuar se ata që ai i përshkroi si “terroristë” duhet të “vriten një nga një”.

Duke folur për palestinezët që mbahen në burgjet izraelite, Ben-Gvir u mburr se ata “vuajnë shumë” dhe shtoi se ishte “i kënaqur” me kushtet çnjerëzore në të cilat ndodheshin.

Ai bëri thirrje gjithashtu për nxjerrjen jashtë ligjit të grupeve izraelite për të drejtat e njeriut që promovojnë bashkëjetesën ndërmjet palestinezëve dhe izraelitëve, si Peace Now dhe Standing Together, duke i akuzuar ato se “mbështesin terrorizmin”.

Sipas organizatave palestineze dhe izraelite për të drejtat e njeriut, rreth 9.500 palestinezë, përfshirë gra dhe fëmijë, aktualisht mbahen në burgjet izraelite.