Shtetet e Bashkuara i kanë bërë të ditur Izraelit se armëpushimi i zgjatur së fundmi me Iranin do të skadojë të dielën, sipas raportimeve të mediave izraelite.

Transmetuesi publik izraelit KAN raportoi të mërkurën se zyrtarë amerikanë i kanë komunikuar Tel Avivit se afati i vendosur nga presidenti Donald Trump për Teheranin pritet të përfundojë brenda pak ditësh.

Duke cituar një burim diplomatik anonim, transmetuesi tha se Trump synon të arrijë mirëkuptime me Iranin, në vend që të angazhohet në negociata të pafundme.

Burime izraelite gjithashtu thanë se një përparim deri të dielën duket i pamundur.

Ato përshkruan gjithashtu atë që e quajtën “konfuzion” në sjelljen e ShBA-së, duke thënë se kohët e fundit janë informuar për lëvizjet e Trump përmes raportimeve mediatike dhe postimeve të tij në rrjetet sociale.

Më herët të mërkurën, një zyrtar i Shtëpisë së Bardhë i tha Fox News se armëpushimi mund të zgjasë nga tre deri në pesë ditë, ndërsa një burim izraelit tha se situata mbetet e paqartë dhe varet kryesisht nga vendimet e Trump, sipas transmetuesit.

Të martën, Trumpi njoftoi zgjatjen e armëpushimit me Iranin pas një kërkese nga Pakistani, duke thënë se ai do të mbetet në fuqi derisa Teherani të paraqesë atë që e quajti një “propozim të unifikuar”.

Përplasjet në rajon janë përshkallëzuar që kur ShBA-ja dhe Izraeli ndërmorën sulme të përbashkëta ndaj Iranit më 28 shkurt. Në përgjigje, Teherani u kundërpërgjigj me sulme ndaj Izraelit dhe vendeve të tjera të rajonit që strehojnë asete amerikane.

Pakistani priti bisedimet mes Uashingtonit dhe Teheranit më 11-12 prill, pasi ndërmjetësoi armëpushimin më 8 prill. Përpjekjet për një raund tjetër negociatash janë në zhvillim, megjithëse pasiguria mbetet.