Ministri i Jashtëm i Türkiyes diskuton zhvillimet rajonale me homologët nga Katari dhe Azerbajxhani
Në telefonata të ndara, ministrat shprehin solidaritet dhe mbështetje lidhur me raketën balistike të lëshuar drejt Türkiyes.
Ministri i Jashtëm i Türkiyes, Hakan Fidan, diskutoi të premten zhvillimet rajonale me homologët e tij nga Azerbajxhani dhe Katari.
Sipas burimeve diplomatike turke, Fidan zhvilloi telefonata të ndara me ministrin e Jashtëm të Katarit, Mohammed bin Abdulrahman Al Thani, dhe ministrin e Jashtëm të Azerbajxhanit, Jeyhun Bayramov.
Gjatë bisedimeve, ministrat shprehën gjithashtu solidaritetin dhe mbështetjen e tyre lidhur me raketën e lëshuar drejt Türkiyes.
Ministria e Mbrojtjes Kombëtare e Türkiyes njoftoi më herët të premten se një municion balistik i lëshuar nga Irani në hapësirën ajrore turke u neutralizua nga sistemet ajrore dhe të mbrojtjes raketore të NATO-s të dislokuara në Mesdheun Lindor. Ky ishte incidenti i tretë i tillë që nga fillimi i luftës mes ShBA-së dhe Izraelit kundër Iranit.
Izraeli dhe ShBA-ja nisën një sulm të përbashkët ndaj Iranit më 28 shkurt, duke vrarë deri tani rreth 1.300 persona, përfshirë edhe udhëheqësin e atëhershëm suprem, Ali Khamenei.
Teherani u kundërpërgjigj me sulme me dronë dhe raketa që kanë shënjestruar Izraelin, Jordaninë, Irakun dhe vendet e Gjirit që strehojnë baza ushtarake amerikane, duke shkaktuar viktima dhe dëme në infrastrukturën civile.