Të shtënat izraelite vranë një nxënëse palestineze të klasës së tretë brenda klasës së saj në veri të Gazës të enjten, në një shkelje të re të marrëveshjes së armëpushimit, bëri të ditur Ministria e Arsimit.

Ministria e identifikoi vajzën si Ritaaj Rihan, duke thënë se ajo ishte ulur në bankën e saj në Shkollën “Abu Ubaida bin al-Jarrah” kur u qëllua para shokëve të klasës.

Sipas ministrisë, incidenti shkaktoi trauma të rënda psikologjike te nxënësit, duke e përshkruar vrasjen si një “krim brutal dhe i tmerrshëm”.

“Nuk ishte një incident i izoluar, por një vazhdim i drejtpërdrejtë i një politike sistematike që synon popullin palestinez,” thuhet në reagimin e ministrisë.

Ministria shtoi se Izraeli mban përgjegjësi të plotë për vrasjen dhe paralajmëroi se heshtja e vazhdueshme ndërkombëtare përbën “bashkëfajësi”.

Sipas Ministrisë së Shëndetësisë në Gaza, të paktën 738 palestinezë janë vrarë dhe 2.036 të tjerë janë plagosur nga sulmet pothuajse të përditshme izraelite, në shkelje të armëpushimit që është në fuqi që nga tetori i vitit 2025.

Armëpushimi pasoi më shumë se dy vite lufte shkatërruese, gjatë së cilës janë vrarë mbi 72.000 palestinezë, janë plagosur më shumë se 172.000 të tjerë dhe është shkatërruar rreth 90% e infrastrukturës së enklavës.