Gati tre të katërtat e institucioneve të Bashkimit Evropian (BE) i drejtojnë shërbimet e tyre të postës elektronike përmes serverëve të operuar nga kompani amerikane, duke ngritur shqetësime lidhur me sovranitetin digjital të bllokut evropian. 

Sipas një studimi të kryer nga transmetuesi publik holandez NOS, gjetjet vijnë në një kohë kur Komisioni Evropian ka theksuar gjithnjë e më shumë nevojën për të reduktuar varësinë e Evropës nga ofruesit e huaj të teknologjisë.

Vetë Komisioni Evropian përdor shërbime të postës elektronike të ofruara nga kompani amerikane, ndërsa Agjencia Evropiane e Mbrojtjes, disa rregullatorë të tregjeve financiare dhe organet e BE-së përgjegjëse për luftën kundër terrorizmit dhe pastrimit të parave përdorin gjithashtu Microsoft-in për shërbimet e postës elektronike.

Transmetuesi raportoi se Banka Qendrore Evropiane përdor një tjetër shërbim të postës elektronike me bazë në ShBA.

Sipas transmetuesit publik holandez, Komisioni Evropian nuk iu përgjigj pyetjeve lidhur me vendndodhjen fizike të të dhënave të tij të postës elektronike.

Ndërkohë, sipas raportit, Parlamenti Evropian, Europol dhe Gjykata e Drejtësisë e BE-së nuk përdorin serverë poste elektronike me bazë në ShBA.

Eurodeputeti holandez, Bart Groothuis, tha për transmetuesin se shërbimet e postës elektronike të përdorura nga institucionet e BE-së duhet të mbeten të besueshme dhe se përmes tyre kalon rregullisht informacion i ndjeshëm.

“Ky është një shërbim që duhet të funksionojë gjithmonë dhe përmes tij kalon rregullisht informacion i ndjeshëm, ndaj kontrolli duhet të mbetet në duart e Evropës”, tha Groothuis, duke shtuar se Evropa duhet të shmangë krijimin e varësisë teknologjike nga një vend i vetëm.

Edhe eurodeputetja Kim van Sparrentak argumentoi se institucionet e BE-së duhet të shqyrtojnë mundësinë e zhvendosjes së shërbimeve të tilla brenda bllokut evropian.