Ministri italian i Punëve të Jashtëm, Antonio Tajani, ka njoftuar se Italia dhe Egjipti do të nënshkruajnë një marrëveshje për punësimin, që synon reduktimin e migracionit të parregullt dhe rritjen e rekrutimit të punëtorëve migrantë përmes kanaleve të ligjshme.

“Me Egjiptin, Italia do të duhet të trajtojë gjithnjë e më shumë çështjen e migracionit, aq sa sot po nënshkruajmë një marrëveshje, të cilën do ta nënshkruaj me ministrin e jashtëm”, tha Tajani në një konferencë për media pas mbërritjes së tij në aeroportin e Kajros.

Sipas agjencisë së lajmeve ANSA, Tajani tha se bashkëpunimi mes dy vendeve mund të garantojë gjithnjë e më pak emigrantë të parregullt dhe në vend të kësaj një numër në rritje të migrantëve të ligjshëm.

“Këta emigrantë mund të punësohen në kompanitë tona përmes trajnimit të duhur”, tha Tajani.