Me nisjen e Kupës së Botës FIFA 2026 në ShBA, Kanada dhe Meksikë, rritja e madhe e çmimeve të biletave krahasuar me vitin 2022 ka shkaktuar kritika, duke rënduar xhepat e tifozëve të futbollit dhe duke rrezikuar të lërë shumë prej tyre jashtë stadiumeve.
Turneu do të nisë të enjten me ndeshjen hapëse mes Meksikës dhe Afrikës së Jugut në Stadiumin e Mexico City-t dhe do të përmbyllet më 19 korrik në Stadiumin New York-New Jersey.
Në total do të zhvillohen 104 ndeshje në 16 stadiume, në katër zona të ndryshme kohore. ShBA-ja do të presë 78 ndeshje.
Biletat për ndeshjen hapëse shumë më të shtrenjta
Në vitin 2026, çmimet e biletave përcaktohen në katër kategori të ndryshme, ndërsa biletat për ndeshjen hapëse nisin nga 560 dollarë dhe ato më të shtrenjtat arrijnë deri në 2.735 dollarë.
Në Kupën e fundit të Botës në Katar, çmimi i biletave për ndeshjen hapëse varionte nga 55 deri në 618 dollarë.
Çmimet e biletave për ndeshjet e fazës së grupeve në turneun e këtij viti janë mesatarisht rreth 400 dollarë.
Në Katar, çmimet e biletave për ndeshjet e fazës së grupeve varionin nga 11 deri në 220 dollarë.
Finalja rreth 10 herë më e shtrenjtë
Bileta më e lirë për finalen e Kupës së Botës 2026 në ShBA është rreth 10 herë më e shtrenjtë se bileta më e lirë e paguar nga tifozët për finalen e vitit 2022 në Lusail të Katarit.
Bileta më pak e shtrenjtë për finalen në ShBA kushton 2.030 dollarë, ndërsa më e shtrenjta arrin në 6.370 dollarë.
Bileta më e lirë për finalen e vitit 2022 në Katar ishte 206 dollarë, ndërsa më e shtrenjta 1.607 dollarë.
Në platformën zyrtare të rishitjes së FIFA-s, çmimi i biletave për finalen mund të arrijë deri në 2 milionë dollarë.
Praktikat e shitjes së biletave përballen me hetim
Rritja e fortë e çmimeve është kthyer në një nga çështjet më të diskutueshme rreth Kupës së Botës 2026.
Për herë të parë, FIFA ka prezantuar çmimin dinamik, duke lejuar që çmimet e biletave të ndryshojnë në varësi të kërkesës.
Grupet e tifozëve kanë kritikuar gjithashtu atë që e cilësojnë si mungesë transparence lidhur me disponueshmërinë e biletave, çmimet dhe ndarjen e ulëseve.
Polemikat kanë tërhequr edhe vëmendjen e autoriteteve rregullatore në SHBA. Prokurorët e përgjithshëm të New York-ut dhe New Jersey-t kanë nisur së fundmi një hetim mbi praktikat e FIFA-s për shitjen e biletave për ndeshjet në Stadiumin New York-New Jersey, ku do të zhvillohet finalja.
Hetimi përqendrohet te ankesat se tifozët mund të jenë keqinformuar për vendndodhjen e ulëseve dhe kategoritë e biletave, pasi gjatë procesit të shitjes janë bërë ndryshime në hartat e ulëseve të stadiumit.
Grupi Football Supporters Europe shpreh kundërshtimin
Në fund të marsit, Football Supporters Europe (FSE) dhe Euroconsumers paraqitën një ankesë në Komisionin Evropian, duke pretenduar se FIFA ka abuzuar me pozitën e saj monopol duke vendosur çmime të tepruara të biletave dhe kushte të padrejta blerjeje përpara turneut.
Grupet argumentuan se çmimet e biletave janë rritur shumë më tepër se në Kupat e mëparshme të Botës dhe kritikuan përdorimin e çmimit dinamik nga FIFA. Ato ngritën gjithashtu shqetësime për atë që e përshkruajnë si mungesë transparence lidhur me disponueshmërinë e biletave, vendndodhjen e ulëseve dhe çmimet.
FSE-ja dhe Euroconsumers thanë se disa bileta me çmim të ulët, të promovuara nga FIFA, ishin kryesisht të padisponueshme në momentin kur u hapën shitjet e përgjithshme, ndërsa tifozët shpesh kishin informacion të kufizuar për vendndodhjen e ulëseve para blerjes.
“FIFA mban monopolin mbi shitjen e biletave për Kupën e Botës 2026 dhe e ka përdorur këtë fuqi për t’u imponuar tifozëve kushte që nuk do të ishin kurrë të pranueshme në një treg konkurrues”, thanë grupet në një deklaratë të përbashkët.
“Për shumë njerëz, kjo është një përvojë që ndodh një herë në jetë; qasja e drejtë dhe transparente në bileta është thelbësore”.
