Kryeministri i Kosovës, Albin Kurti, e konsideron jokushtetues dekretin e presidentes Vjosa Osmani për shpërndarjen e Kuvendit të Kosovës.

Në një konferencë për media nga Qeveria e Kosovës, Kurti tha se kompetenca për shpërndarjen e Kuvendit mund të ushtrohet vetëm në rastet e paracaktuara shprehimisht nga Kushtetuta.

“Dekreti për shpërndarjen e Kuvendit dhe shpalljen e zgjedhjeve nuk është kushtetues, sepse kompetenca për shpërndarjen e Kuvendit mund të ushtrohet vetëm në rastet e paracaktuara shprehimisht nga Kushtetuta. Andaj, të dashur qytetarë, të nderuar gazetarë, kjo përbën edhe një tjetër lëndë për Gjykatën Kushtetuese”, tha Kurti.

Presidentja Osmani e shpërndau Kuvendin me arsyetimin se dështoi zgjedhja e presidentit deri më 5 mars të vitit 2026, por kryeministri Kurti për këtë tha se procesi nuk ka konsumuar as raundin e parë, e lërë më të dytin dhe të tretin, pas të cilave më pas do të bënte që vendi të shkonte automatikisht në zgjedhje të reja.

Kurti tha se Kosova tani është në një situatë ku nuk mund të flitet për zgjedhje pa e thënë fjalën e fundit Gjykata Kushtetuese, aty ku partia e tij Lëvizja Vetëvendosje e dërgoi për vlerësim dekretin e presidentes Osmani.

Ai tha se neni 82 i Kushtetutës së Kosovës përcakton afatin 60 ditor për zgjedhjen e presidentit nga dita kur ka nisur procedura dhe që sipas tij i njëjti mbyllet më 5 maj, e jo më 5 mars.

“Unë më herët kam parë gatishmëri për zgjedhje, por nuk kam parë zell për zgjedhje të reja, të përsëritura. Tani po shoh edhe zell për zgjedhje të reja, të përsëritura, të cilat do të na marrin kohë më shumë. Do të mund të jenë zgjedhje, por nuk mund të shoh se si do të mund të jenë zgjidhje. Për shkak se, bëhet fjalë për kuoruimin prej 80 deputetëve në sallë që duhet ta sigurojmë bashkërisht të gjithë. Nuk mund të presim që të fillojmë zgjedhjet në fushata ku do të themi se unë marr 80 deputetë së paku. Pra, nuk është çështje e 61-shit, por e 80-shit”, tha Kurti.

Kurti gjithashtu tha se shpërndarja e Kuvendit ka pamundësuar mbajtjen e një seance parlamentare të planifikuar për pasditen e së premtes, në të cilën pritej të ratifikoheshin disa marrëveshje ndërkombëtare me përfitim prej 121 milionë eurove për qytetarët e Kosovës.

Duke folur për krerët e partive opozitare, Kurti tha se qasja e tyre tani ka ndryshuar dhe është konstruktive, krahasuar me vite më parë. Ai tha se edhe kur kanë mospajtime, me kreun e Partisë Demokratike të Kosovës dhe me kreun e Lidhjes Demokratike të Kosovës, kanë komunikim.