Shefi i Komunikimit i Türkiyes: Mbrojtja e së vërtetës është thelbësore në "epokën e dezinformimit"
Drejtori i Drejtorisë së Komunikimit të Presidencës Turke, Burhanettin Duran, nënvizon nevojën për të mbrojtur të vërtetën dhe për të luftuar operacionet e perceptimit në mbarë botën në "epokën e sotme të dezinformimit".
Shefi i Komunikimit i Türkiyes, Prof. Dr. Burhanettin Duran, ka paralajmëruar se në arkitekturën e re të sigurisë, mbrojtja e së vërtetës është një përgjegjësi po aq thelbësore sa mbrojtja e kufijve fizikë.
“Dezinformimi nuk është thjesht një çështje komunikimi, ai përbën një kërcënim të drejtpërdrejtë për sigurinë kombëtare dhe madje edhe atë globale”, tha shefi i Komunikimit të premten.
Duke folur në Samitin Ndërkombëtar të Komunikimit Strategjik (STRATCOM) 2026 në Istanbul, ai përshkroi një “epokë dezinformimi” ku inteligjenca artificiale, algoritmet digjitale dhe manipulimi i medias përdoren për të shtrembëruar realitetin, duke e kthyer informacionin në një armë të ndikimit global.
“Si Türkiye, ne e kemi përqafuar mbrojtjen e së vërtetës jo si diçka opsionale, por si një detyrë dhe përgjegjësi themelore në ‘epokën e sotme të dezinformimit’”, tha ai.
Ai gjithashtu theksoi nevojën për një “arsye shtetërore” (raison d’état) të fortë për të kundërshtuar “operacionet e perceptimit” që përpiqen të manipulojnë pikëpamjet e publikut mbi të ardhmen.
“Sigurimi i drejtësisë në komunikim është çelësi për rivendosjen e paqes, sigurisë dhe stabilitetit global”, shtoi Duran.
Duran argumentoi gjithashtu se informacioni është bërë një mjet parësor i fuqisë, dhe jo më thjesht një mjet për komunikim apo ndarje të njohurive.
Epoka e “pasigurisë”
Shefi i komunikimit paralajmëroi se sistemi ndërkombëtar i pas Luftës së Dytë Botërore po kalon një kolaps strukturor, duke krijuar “pasiguri” të thellë dhe duke tronditur normat e vendosura të qeverisjes globale.
Ai citoi Gazën si një shembull dështimesh morale dhe sistemike, duke thënë se heshtja ndërkombëtare ka lejuar që narrativat e njëanshme të gërryejnë besueshmërinë dhe të normalizojnë retorikën islamofobe dhe raciste.
“Ligji ndërkombëtar ka mbetur i pazbatuar mes gjenocidit të Izraelit, ndërsa sistemi global ka heshtur ndërkohë që civilët përballen me vrasje të gjera. Një grup vendesh që zbaton rregullisht standarde të dyfishta, nuk po gërryen vetëm besueshmërinë e vet, por po humbet autoritetin moral që pretendonte dikur”, tha Duran.
Türkiye, vuri në dukje Duran, ka ndjekur një strategji ndërmjetësimi dhe diplomacie, me synimin për të zgjidhur konfliktet në Ukrainë, Siri dhe Irak, ku zgjidhjet ushtarake kanë dështuar.
Ai vuri në dukje se qendra e Türkiyes për luftimin e dezinformimit ka identifikuar mijëra raporte mashtruese që nga viti 2022, duke publikuar gjetjet në dhjetë gjuhë për audiencën e brendshme dhe ndërkombëtare.
Duran bëri thirrje për një kornizë etike ndërkombëtare për komunikimin dixhital, duke këmbëngulur se rivendosja e besimit te informacioni është thelbësore për rindërtimin e stabilitetit dhe besimit global.