Shefi i Inteligjencës së Türkiye, Ibrahim Kalin, u takua sot në Ankara me ministrin e Jashtëm sirian, Asaad Hassan al-Shaibani për të diskutuar mbi lidhjet dypalëshe, zhvillimet rajonale dhe bashkëpunimin e sigurisë, thanë burime turke të sigurisë.
Takimi, i organizuar nga shefi i Organizatës Kombëtare të Inteligjencës (MIT), Kalin, u fokusua në marrëdhëniet Türkiye-Siri, fushat e bashkëpunimit dypalësh, marrëdhëniet me vendet fqinje, stabilitetin rajonal, zhvillimet e fundit në Liban dhe lidhjet Siri-Liban, thanë burimet.
Të dyja palët diskutuan për implikimet e mundshme për Sirinë nga projektligji i propozuar i Türkiyes për Forcimin e Solidaritetit Kombëtar dhe Kohezionit Social.
Integrimi i SDF-së, kundër terrorizmit
Kalin dhe Shaibani shqyrtuan progresin në procesin e integrimit të Forcave Demokratike Siriane (SDF) dhe mënyrat për ta forcuar bashkëpunimin në luftën kundër terrorizmit.
Ata theksuan se po ndërmerren hapa konstruktivë për ta siguruar përfundimin me sukses të procesit të integrimit të SDF-së në Siri.
Në takim u theksua gjithashtu se qeveria siriane vazhdon ta luftojë efektivisht grupin terrorist DEASh, si pjesë e përpjekjeve për të siguruar stabilitet në vend.
Të dyja palët diskutuan më tej për pasojat politike dhe ekonomike të luftës ShBA-Izrael-Iran në rajon si dhe zhvillimet e fundit në lidhje me sanksionet ndaj Sirisë dhe investimet në vend.
Në takim u theksuan përpjekjet e Sirisë për të qëndruar jashtë konflikteve dhe luftërave të fundit në rajon.
