Këshilli i Sigurisë Kombëtare i Türkiyes të mërkurën i bëri thirrje komunitetit ndërkombëtar të ndërmarrë “hapa konkretë” ndaj Izraelit, duke thënë se ky vend po përpiqet ta minojë stabilitetin rajonal, ndërsa shkel integritetin territorial dhe sovranitetin e Sirisë.
Pas një mbledhjeje të kryesuar nga presidenti Recep Tayyip Erdoğan, Këshilli tha se janë vërejtur zhvillime pozitive në përpjekjet për forcimin e unitetit dhe integritetit territorial të Sirisë, shtrirjen e autoritetit shtetëror në gjithë vendin dhe avancimin e procesit të integrimit.
Këshilli tha se mbështetja e Türkiyes për popullin sirian do të vazhdojë në përpjekjet për rindërtimin e vendit dhe forcimin e lidhjeve me komunitetin ndërkombëtar.
Këshilli tha se Izraeli ka vazhduar sulmet në Gaza dhe Liban pa i përmbushur angazhimet dhe detyrimet e tij lidhur me vendosjen e paqes.
Ai tha gjithashtu se lufta e ShBA/Izrael-it me Iranin është shndërruar në një “cikël vicioz”, duke shkaktuar cenueshmëri në gjithë rajonin, dhe u bëri thirrje palëve të rikthehen në negociata.
Këshilli u bëri thirrje palëve t’i japin fund konfliktit, pasojat globale të të cilit, sipas tij, po bëhen gjithnjë e më të rënda.
Këshilli u informua gjithashtu mbi përpjekjet brenda dhe jashtë vendit kundër kërcënimeve ndaj unitetit kombëtar, integritetit territorial dhe sigurisë së Türkiyes, veçanërisht nga PKK/KCK-PYD/YPG, organizata terroriste FETO dhe grupi terrorist ISIS (Daesh).
Këshilli vlerësoi hapat e ndërmarrë drejt objektivave të një “Türkiye pa terror” dhe një “rajoni pa terror”, duke thënë se përpjekjet për garantimin e sigurisë së Türkiyes, popullit të saj dhe vendeve fqinje do të vazhdojnë me vendosmëri.
Lidhur me Irakun, Këshilli e theksoi rëndësinë kritike të paqes dhe stabilitetit të vendit për mbarë rajonin.
Ai i mirëpriti përpjekjet e Bagdadit për forcimin e sovranitetit shtetëror në gjithë vendin dhe rikonfirmoi vendosmërinë e Türkiyes për të avancuar bashkëpunimin strategjik me Irakun.
Këshilli diskutoi gjithashtu zhvillimet e fundit në luftën Rusi-Ukrainë dhe ndikimet rajonale e globale të sulmeve ndaj infrastrukturës civile dhe rrugëve të lundrimit.
Ai u bëri thirrje palëve të tregojnë përmbajtje dhe të bien dakord për një armëpushim, në kushtet e shenjave të përshkallëzimit të pakontrolluar dhe përhapjes së konfliktit.
Lidhur me Jemenin, Këshilli tha se rritja e tensioneve i ka shtuar rreziqet e sigurisë në rajon, veçanërisht për vendet fqinje.
Ai e theksoi nevojën urgjente për rikthimin e qetësisë, duke thënë se kjo është gjithashtu e rëndësishme për stabilitetin global.
