Emiratet e Bashkuara Arabe kanë bërë të ditur se sistemet e tyre të mbrojtjes ajrore kanë “identifikuar dhe neutralizuar me sukses” gjashtë dronë armiqësorë që tentuan të shënjestrojnë zona civile dhe infrastrukturë jetike në vend gjatë 48 orëve të fundit.
“Forcat e mbrojtjes ajrore kanë ndërhyrë me sukses dhe kanë neutralizuar objektivat armiqësore me një nivel të lartë gatishmërie dhe efikasiteti, pa viktima njerëzore dhe pa ndikim në sigurinë e infrastrukturës kritike”, tha Ministria e Mbrojtjes në rrjetin social amerikan X.
Lidhur me sulmin e së dielës ndaj centralit bërthamor Barakah, ministria tha se gjurmimi teknik dhe monitorimi kanë konfirmuar se tre dronët e përfshirë kanë ardhur të gjithë nga territori irakian, “dy prej të cilëve u neutralizuan me sukses, ndërsa i treti goditi një gjenerator të jashtëm energjie jashtë perimetrit të brendshëm të centralit në atë datë, përveç dronëve të tjerë që u kapën më vonë”.
Ministria shtoi se vendi ruan “të drejtën e plotë për të marrë të gjitha masat e nevojshme për të mbrojtur sovranitetin dhe sigurinë kombëtare në përputhje me ligjet dhe konventat ndërkombëtare”.
Të dielën, zyrtarët e vendit thanë se një zjarr shpërtheu pranë centralit në Abu Dhabi si pasojë e një sulmi me dron.
Ngjarjet vijnë në një kohë kur tensionet rajonale janë rritur pas sulmeve të SHBA-së dhe Izraelit ndaj Iranit në shkurt. Teherani është kundërpërgjigjur me sulme ndaj Izraelit dhe aleatëve amerikanë në Gjirin Persik, përfshirë Emiratet e Bashkuara Arabe, si dhe me mbylljen e Ngushticës së Hormuzit.
Një armëpushim hyri në fuqi më 8 prill përmes ndërmjetësimit të Pakistanit, por bisedimet në Islamabad nuk arritën një marrëveshje afatgjatë. Presidenti amerikan, Donald Trump, më vonë e zgjati armëpushimin pa afat të caktuar.
