Türkiye dërgoi sot anijen e saj të shpimit në ujëra të thella “Cagri Bey” në Somali për misionin e saj të parë jashtë vendit, një hap që ministri i Energjitikës dhe Burimeve Natyrore, Alparslan Bayraktar, e cilësoi si historik në përpjekjet e vendit për energjinë në det të hapur.

Duke folur në një ceremoni në portin Tasucu në Mersin, Bayraktar tha se anija pritet të mbërrijë në Mogadishu për rreth 45 ditë dhe të nisë shpimet në prill në pusin Curad-1.

Türkiye dhe Somalia nënshkruan marrëveshje në vitin 2024 për kërkime të naftës dhe gazit si në tokë, ashtu edhe në det. Anija sizmike “Oruç Reis” më herët kishte përfunduar matjet në tri blloqe detare.

Me shtimin e anijeve Cagri Bey dhe Yıldırım numri i anijeve të shpimit në flotën e Türkiyes është rritur në gjashtë, tha Bayraktar. Së bashku me anijet sizmike Oruç Reis dhe “Barbaros Hayrettin Pasha”, Türkiyea tani ka flotën e katërt më të madhe në botë për kërkime energjetike në det të hapur.

Që nga fillimi i këtij viti, Türkiye ka nënshkruar marrëveshje strategjike me kompanitë amerikane ExxonMobil dhe Chevron, si dhe me kompaninë britanike BP, për kërkime të naftës dhe gazit, tha Bayraktar. Ai shtoi se javën e ardhshme pritet të nënshkruhet edhe një marrëveshje tjetër partneriteti detar jashtë vendit me një kompani ndërkombëtare.

Bayraktar tha se Türkiye synon që kompania e saj kombëtare e naftës të arrijë prodhim rreth 500 mijë fuçi naftë dhe gaz në ditë deri në vitin 2028, me një objektiv afatgjatë për ta rritur kapacitetin në 1 milion fuçi në ditë.

“Besoj fuqishëm se Cagri Bey, të cilën po e dërgojmë për herë të parë të kërkojë naftë jashtë ujërave tona territoriale, do t’i çojë marrëdhëniet Türkiye–Somalia në një nivel më të lartë”, tha Bayraktar, duke i uruar ekuipazhit një mision të sigurt dhe të suksesshëm.