Trump thotë se një “numër më i madh anijesh” po drejtohet drejt Iranit, sinjalizon marrëveshje
“Shpresojmë të arrijmë një marrëveshje. Nëse arrijmë një marrëveshje, kjo është mirë. Nëse nuk arrijmë një marrëveshje, do të shohim çfarë do të ndodhë”, thotë presidenti amerikan.
Presidenti i ShBA-së, Donald Trump, tha të premten se një forcë e konsiderueshme detare amerikane po lëviz drejt Iranit, duke sinjalizuar shpresë për arritjen e një marrëveshjeje me Teheranin mbi programin e tij bërthamor, por duke lënë njëkohësisht të hapura edhe opsionet e tjera.
“Kemi një armadë të madhe, një flotilje… që po drejtohet drejt Iranit pikërisht tani, madje më të madhe se ajo që kishim në Venezuelë”, tha Trump në Shtëpinë e Bardhë.
Ai përsëriti se ShBA-ja po dërgon “në fakt, një numër edhe më të madh anijesh” drejt Iranit.
“Shpresojmë të arrijmë një marrëveshje. Nëse arrijmë një marrëveshje, kjo është mirë. Nëse nuk arrijmë një marrëveshje, do të shohim çfarë do të ndodhë”, tha ai, duke shtuar se Irani dëshiron të arrijë një marrëveshje.
I pyetur nëse i ka vendosur Iranit ndonjë afat për arritjen e një marrëveshjeje, Trump u përgjigj: “Vetëm ata e dinë me siguri.”
Ai tha se ka komunikuar me ta. “Ata po planifikonin të varnin 837 persona. Dhe unë u thashë: ‘Nëse e bëni këtë, do të paguani një çmim si askush më parë’. Dhe ata u tërhoqën. E vlerësova këtë… Pra, do të shohim çfarë do të ndodhë. Mund ta them këtë: ata duan të bëjnë një marrëveshje”, tha Trump.
Ndërkohë, Presidenti iranian Masoud Pezeshkian deklaroi të premten se përpjekjet diplomatike me ShBA-në mund të kenë sukses vetëm nëse Uashingtoni heq dorë nga kërcënimet dhe veprimet që e nxisin luftën në rajon, duke theksuar se dialogu kërkon vullnet të mirë dhe besim të ndërsjellë.
Zyrtarë iranianë kanë paralajmëruar se çdo sulm amerikan do të përballej me një përgjigje “të shpejtë dhe gjithëpërfshirëse”, ndërsa kanë përsëritur se Teherani mbetet i hapur për bisedime vetëm mbi atë që e përshkruan si “kushte të drejta, të balancuara dhe jo shtrënguese”.