Ahmed Tavil, 40 vjeç, banor i Gutës Lindore në kryeqytetin sirian Damask, po përpiqet ta gjelbërojë sërish lagjen e tij, e cila u shndërrua në rrënoja nga sulmet e regjimit të rrëzuar të Bashar Asadit, duke mbjellë pemë, kultivuar perime dhe rritur lule.
Gjatë luftës civile, Guta Lindore u përball me bombardime të shumta ajrore dhe sulme tokësore. Pavarësisht shkatërrimeve të mëdha, Tavil u kthye në shtëpinë e tij dykatëshe, e cila kishte mbijetuar, dhe nisi të pastronte rrënojat përreth, duke i kthyer tokat në hapësira të përshtatshme për bujqësi.
Pas vitesh sulmesh që e kthyen lagjen në gërmadha, ai synon ta rigjallërojë zonën përmes pemëve, perimeve dhe bimëve të ndryshme që ka mbjellë përreth shtëpisë. Mes rrënojave, Tavil ka krijuar një hapësirë më të gjelbër, ku rrit edhe lule dhe mban kafshë.
Në një intervistë për Anadolu, ai tha se pas kthimit kishte riparuar shtëpinë dhe kishte rikthyer në përdorim tokat bujqësore përreth.
"U ktheva këtu, sistemova shtëpinë dhe u vendosa. Rrafshuam tokën, e mbollëm dhe e ujitëm. Gjithashtu rregulluam tokat përreth shtëpisë dhe nisëm të merremi me bujqësi. Falë Zotit, gjendja këtu është përmirësuar. I pastruam rrënojat dhe rifilluam të jetojmë në shtëpitë tona", tha ai.
Tavil tregoi se Guta Lindore kishte pësuar shkatërrime të mëdha gjatë luftës, por lagjja e tij gradualisht po rifiton gjelbërimin.
"Zona ka ndryshuar plotësisht. Dikur këtu kishte vetëm rrënoja dhe grumbuj pluhuri. I sistemuam tokat dhe i mbollëm përsëri. Tani jetojmë këtu dhe aktualisht nuk kemi ndonjë vështirësi të madhe", u shpreh ai.
Ringjallja e kujtimeve
Duke theksuar se lagjja për të nuk është thjesht një vendbanim, por një hapësirë e lidhur me të kaluarën dhe kujtimet e tij, Tavil tha se dëshiron të fshijë gjurmët e luftës dhe të rikthejë jetën e dikurshme.
"Këtu kishim shumë kujtime nga e kaluara. Po përpiqemi t'i ringjallim të gjitha. Jeta ka filluar të kthehet si dikur, madje edhe më mirë", tha ai.
Tavil tregoi se në vitin 2012 ishte detyruar të largohej nga Guta Lindore dhe të zhvendosej në zona të tjera, ndërsa në vitin 2017, pas përfundimit të sulmeve, ishte kthyer në lagjen e tij.
Pas kthimit, ai nisi të riparonte shtëpinë, të rregullonte hapësirat përreth dhe të rikthente tokat bujqësore në gjendjen e mëparshme.
"Rregulluam mjedisin përreth, shtëpitë dhe tokat bujqësore. Të gjithë po kthehen në tokat dhe shtëpitë e tyre. Këtu kishim shumë fqinj dhe njerëz të afërt, por të gjithë u larguan. Tani përpiqemi t'i kujtojmë ata njerëz dhe atë që kemi përjetuar në të kaluarën. Disa i kemi humbur, disa kanë ndërruar jetë, ndërsa të tjerë janë kthyer në shtëpitë e tyre. Falë Zotit për gjithçka", u shpreh ai.
