Ndërron jetë legjenda e boksit kosovar, Nazif Gashi, në moshën 74-vjeçare
Gashi ishte ndër sportistët që formësuan identitetin e boksit kosovar në vitet ’70 dhe ’80, periudhë në të cilën Prishtina dominonte arenën jugosllave dhe ngrinte lart emrin e Kosovës me paraqitje brilante.
Ka ndërruar jetë në moshën 74-vjeçare një nga emrat më të shquar të sportit kosovar, Nazif Gashi, figurë qendrore e boksit dhe pjesë e gjeneratës së artë të klubit të Prishtinës. Lajmin e hidhur e kanë bërë të ditur familjarët e tij, duke lënë komunitetin sportiv të tronditur dhe të pikëlluar.
Gashi ishte ndër sportistët që formësuan identitetin e boksit kosovar në vitet ’70 dhe ’80, periudhë në të cilën Prishtina dominonte arenën jugosllave dhe ngrinte lart emrin e Kosovës me paraqitje brilante. Ai konsiderohej një prej shtyllave të atij ekipi, duke u bërë shembull disipline, force dhe përkushtimi.
Trashëgimia e tij në sport mbetet e pashlyeshme. Për shumë adhurues dhe ish-boksierë, Gashi ishte jo vetëm kampion në ring, por edhe figurë frymëzuese që i hapi rrugën gjeneratave të reja. Largimi i tij lë një boshllëk të madh, por kujtimi dhe ndikimi i tij do të mbeten gjatë në historinë e sportit kosovar.