Sipas një studimi të kryer së fundmi, lodrat e pajisura me inteligjencë artificiale shpesh kanë vështirësi të komunikojnë në mënyrë efektive me fëmijët, duke keqinterpretuar ndonjëherë emocionet e tyre dhe duke dhënë përgjigje të papërshtatshme.

Studimi nga Fakulteti i Edukimit i Universitetit të Kembrixhit analizoi mënyrën se si një grup i vogël fëmijësh të moshës 3 deri në 5 vjeç ndërvepruan me një lodër të butë me inteligjencë artificiale të quajtur Gabbo.

Studimi theksoi se megjithëse disa lodra me inteligjencë artificiale tashmë u tregtohen fëmijëve që nga mosha 3 vjeç, kërkimet mbi ndikimin e tyre te fëmijët parashkollor mbeten të kufizuara.

Gabbo përfshin një chatbot me inteligjencë artificiale të aktivizuar me zë, të zhvilluar nga OpenAI dhe është projektuar për të inkurajuar fëmijët parashkollor të bisedojnë me të dhe të përfshihen në lojë imagjinative.

Raporti pasqyroi edhe pikëpamjet e disa edukatorëve të fëmijërisë së hershme, të cilët thanë se në të ardhmen këto lodra mund të ndihmojnë në mbështetjen e disa aspekteve të zhvillimit të fëmijëve, veçanërisht aftësive gjuhësore dhe të komunikimit.

Megjithatë, studiuesit zbuluan gjithashtu se lodrat me inteligjencë artificiale gjeneruese kanë vështirësi me lojën sociale dhe imagjinative, shpesh duke keqkuptuar fëmijët dhe duke reaguar në mënyrë të papërshtatshme ndaj emocioneve të tyre.

Për shembull, kur një fëmijë 5 vjeçar i tha lodrës “Të dua,” ajo u përgjigj me një kujtesë formale: “Si një kujtesë miqësore, ju lutemi sigurohuni që ndërveprimet të përputhen me udhëzimet e dhëna. Më tregoni si dëshironi të vazhdoni”.

Megjithëse lodrat me inteligjencë artificiale gjeneruese tregtohen si shoqërues për të mësuar, ndikimi i tyre në zhvillimin e hershëm të fëmijëve mbetet kryesisht i pa studiuar dhe studiuesit bënë thirrje për kujdes, duke kërkuar gjithashtu rregullim dhe standarde më të qarta të etiketimit.