Ndërsa çmimet e naftës rriten për shkak të përshkallëzimit të tensioneve në Lindjen e Mesme, disa vende aziatike po i drejtohen punës në distancë për të lehtësuar presionin mbi kërkesën për energji dhe për të mbrojtur ekonomitë e brishta.
Vende si Indonezia, Vietnami, Tajlanda dhe Filipinet kanë nisur të zbatojnë politika pune nga shtëpia dhe masa kursimi energjie të ngjashme me ato të periudhës së COVID-19.
Në Indonezi, zyrtarët po shqyrtojnë një model pune hibrid dhe madje edhe mësim online për të ulur konsumin e karburantit. Ulja e lëvizjes së përditshme mund të reduktojë përdorimin e karburantit deri në 20 për qind, sipas Jakarta Globe.
Vietnami, që varet shumë nga importet e karburantit, u ka bërë thirrje bizneseve të adoptojnë punën në distancë pas rritjeve të ndjeshme të çmimeve të benzinës dhe naftës, të cilat kanë shkaktuar radhë të gjata në pikat e furnizimit. “Bizneset duhet të inkurajojnë punën nga shtëpia kur është e mundur për të reduktuar nevojën për udhëtime dhe transport”, tha Ministria e Tregtisë në një deklaratë në mesin e marsit.
Tajlanda tashmë ka zhvendosur pjesë të sektorit publik në operime në distancë, së bashku me masa të kursimit të energjisë, si kufizimi i përdorimit të ajrit të kondicionuar dhe reduktimi i udhëtimeve zyrtare.
Në Filipine, janë prezantuar forma fleksibile pune dhe një javë pune katërditore për disa punonjës të administratës. Të martën, presidenti Ferdinand Marcos Jr. shpalli gjendje emergjente energjetike në nivel kombëtar, duke aktivizuar masa për stabilizimin e furnizimeve dhe mbrojtjen e ekonomisë nga rritja e kostove të karburantit.
Ndërkohë, Pakistani ka zbatuar disa nga masat më të ashpra në rajon, përfshirë punë të pjesshme në distancë për punonjësit publikë, ulje të kompensimeve për karburant dhe mbyllje të përkohshme të shkollave.
Këto masa vijnë në një kohë kur tregjet globale të energjisë janë tronditur nga konflikti në vazhdim.
ShBA-ja dhe Izraeli kanë kryer sulme ajrore ndaj Iranit që nga 28 shkurti, duke vrarë më shumë se 1.340 persona deri më tani, përfshirë udhëheqësin e atëhershëm suprem të Iranit, Ali Khamenei.
Irani është kundërpërgjigjur me sulme me dronë dhe raketa që kanë në shënjestër Izraelin, si dhe Jordaninë, Irakun dhe vendet e Gjirit që strehojnë baza ushtarake amerikane.
Ngushtica e Hormuzit, një rrugë kyçe globale e transportit detar, gjithashtu është kufizuar ndjeshëm që nga fillimi i marsit. Rreth 20 milionë fuçi naftë kalojnë përmes saj çdo ditë, dhe ndërprerja e saj ka rritur kostot e transportit dhe ka shtyrë çmimet globale të naftës në rritje.
