Sekretari amerikan i Shtetit, Marco Rubio, u takua të hënën në Kuds me presidentin izraelit, Isaac Herzog, për të diskutuar mbi sigurinë e Izraelit dhe përpjekjet për të siguruar lirimin e pengjeve të mbetura në Gaza, tha Departamenti i Shtetit.

Sipas një njoftimi nga zëdhënësi Tommy Pigott, Rubio shprehu ngushëllime për viktimat e sulmit me armë zjarri më 8 shtator në Kuds, ku persona të armatosur hapën zjarr në një stacion autobusi të mbushur me njerëz, duke vrarë dhe plagosur disa izraelitë.

“Sekretari Rubio dhe zyrtarët izraelitë riafirmuan marrëdhënien strategjike mes ShBA-së dhe Izraelit dhe diskutuan mundësitë për integrim rajonal,” tha Pigott.

Rubio mbërriti në Izrael të dielën, disa ditë pas një sulmi izraelit në kryeqytetin e Katarit, Doha, ku u shënjestruan udhëheqës të Hamasit që po zhvillonin bisedime mbi një propozim armëpushimi të ShBA-së. Pesë anëtarë të Hamasit dhe një oficer i sigurisë nga Katari u vranë, duke shkaktuar dënime në mbarë rajonin. Presidenti amerikan Donald Trump tha se ishte “shumë i pakënaqur” me këtë sulm.

Njoftimi i Departamentit të Shtetit për takimin e Rubio me Herzog nuk përmendi sulmet e Izraelit në Katar.

Të dielën, Rubio u takua edhe me kryeministrin Benjamin Netanyahu dhe e shoqëroi gjatë një vizite në Murin Perëndimor (Muri i Vajtimit) në Kudsin Lindor të pushtuar. Ai gjithashtu theksoi se Uashingtoni vazhdon ta konsiderojë Katarin si një ndërmjetës kyç në përpjekjet për të siguruar një armëpushim në Gaza dhe një marrëveshje për pengjet.

Ushtria izraelite ka vazhduar ofensivën brutale në Rripin e Gazës, duke vrarë gati 65.000 palestinezë që nga tetori 2023. Fushata ushtarake ka shkatërruar enklavën, e cila po përballet me uri masive.

Në nëntor të vitit të kaluar, Gjykata Penale Ndërkombëtare lëshoi urdhra arresti për Netanyahun dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.

Izraeli po përballet gjithashtu me një padi për gjenocid në Gjykatën Ndërkombëtare të Drejtësisë për shkak të luftës në enklavë.