Kryeministri i Kosovës, Albin Kurti, është takuar me sekretarin e përgjithshëm të NATO-s, Mark Rutte, në margjinat e Samitit të Komunitetit Politik Evropian (EPC) në Dublin.
Siç njofton Zyra e Kryeministrit, Kurti dhe Rutte kanë biseduar për bashkëpunimin e mirë ndërmjet institucioneve të Kosovës dhe KFOR-it, si dhe për mundësitë konkrete të zgjerimit dhe thellimit të ndërveprimit, sikurse për zhvillimet aktuale dhe për situatën e sigurisë.
"Për ne anëtarësimi në Aleancën Veri-Atlantike është prioritet strategjik, jetësimi i të cilit do t’i shërbente paqes së qëndrueshme dhe sigurisë afatgjate në Ballkanin Perëndimor dhe mbarë kontinentin”, theksoi Kurti.
Ai shtoi se angazhimi i NATO-s në rajon mbetet i rëndësishëm përballë rreziqeve dhe ndikimit të akterëve të jashtëm.
