Irani thotë se SHBA pas dështimit ushtarak po përpiqet të arrijë objektivat përmes një plani 15-pikë

Kryetari i parlamentit iranian akuzoi të dielën SHBA-në se po ndjek një plan 15-pikësh për të arritur objektivat e saj në luftë, pasi ka dështuar t’i realizojë ato me forcë ushtarake, duke paralajmëruar se çdo sulm tokësor ndaj vendit do të përballet me një përgjigje “vendimtare”.

Duke shkruar në Telegram, Mohammad Bagher Qalibaf tha se SHBA “po bën thirrje hapur për negociata, ndërsa fshehtas po planifikon një sulm tokësor”.

Ai tha se iranianët janë të përgatitur për çdo operacion tokësor nga forcat amerikane, duke premtuar një “përgjigje vendimtare” ndaj çdo sulmi të tillë.

“Këto ditë dëgjohen deklarata të ndryshme nga zyrtarët armik për negociata. Amerika po shpreh dëshirat e saj dhe atë që nuk e arriti në luftë po e paraqet si një listë prej 15 pikash dhe po përpiqet ta realizojë përmes diplomacisë.”

Irani të mërkurën hodhi poshtë një plan 15-pikësh të SHBA-së për t’i dhënë fund luftës, duke thënë se çdo armëpushim do të ndodhë vetëm sipas kushteve dhe afateve të Teheranit.

Televizioni shtetëror, duke cituar një zyrtar iranian, tha se Irani ka paraqitur pesë kushte për përfundimin e luftës, përfshirë ndalimin e plotë të “agresionit dhe vrasjeve të synuara”.

Kjo vjen mes raportimeve për plane të SHBA-së për një sulm tokësor ndaj Iranit, ndërsa mijëra trupa amerikane janë vendosur në Lindjen e Mesme, në pritje të një vendimi nga presidenti Donald Trump.

SHBA dhe Izraeli kanë vazhduar sulmet ajrore ndaj Iranit që nga 28 shkurti, duke vrarë deri tani mbi 1.340 persona, përfshirë edhe Udhëheqësin Suprem të atëhershëm Ali Khamenei.

Irani është kundërpërgjigjur me sulme me dronë dhe raketa që kanë shënjestruar Izraelin, si dhe Jordaninë, Irakun dhe vendet e Gjirit që strehojnë baza ushtarake amerikane, duke shkaktuar viktima dhe dëme në infrastrukturë, si dhe duke tronditur tregjet globale dhe aviacionin.