Gati 24 mijë qytetarë amerikanë janë kthyer në mënyrë të sigurt në Shtetet e Bashkuara nga Lindja e Mesme që nga 28 shkurti, njoftoi të premten Departamenti i Shtetit, në mes të luftës së vazhdueshme SHBA-Izrael kundër Iranit.

Në një deklaratë, ndihmëssekretari i Departamentit të Shtetit, Dylan Johnson, tha se kjo shifër nuk përfshin amerikanët që janë zhvendosur në vende të tjera ose ata që janë larguar nga Lindja e Mesme, por ende janë në tranzit për t’u kthyer në SHBA.

“Departamenti vazhdon të kontaktojë në mënyrë proaktive qytetarët amerikanë për t’u ofruar ndihmë udhëtimi me fluturime çarter ose transport tokësor,” tha Johnson.

Disa fluturime çarter tashmë kanë transportuar qindra amerikanë përsëri në SHBA, ndërsa fluturime të tjera pritet të realizohen në ditët në vijim, në varësi të kushteve të sigurisë, shtoi ai.

Njoftimi vjen në një kohë kur dhjetëra mijëra njerëz po përpiqen të largohen nga Lindja e Mesme pas sulmeve të përbashkëta të SHBA-së dhe Izraelit ndaj Iranit, të cilat kanë ndërprerë trafikun ajror në rajon dhe kanë çuar në anulimin masiv të fluturimeve.

Pjesa më e madhe e hapësirës ajrore në rajon është kufizuar dhe më shumë se 23 mijë fluturime janë anuluar që nga fillimi i operacionit javën e kaluar, sipas kompanisë për analiza të aviacionit Cirium.

Tensionet janë rritur që nga 28 shkurti, kur forcat amerikane dhe izraelite nisën sulme ajrore ndaj Iranit, nga të cilat janë vrarë më shumë se 1.000 persona, përfshirë udhëheqësin suprem iranian Ali Khamenei, mbi 150 nxënëse dhe zyrtarë të lartë ushtarakë.

Irani është kundërpërgjigjur me sulme me dronë dhe raketa që kanë shënjestruar objekte të lidhura me SHBA-në në vendet e Gjirit. Një sulm me dron në Kuvajt vrau gjashtë ushtarë amerikanë në një qendër taktike operacionale.