Ministri turk i Energjisë dhe i Burimeve Natyrore, Alparslan Bayraktar, ka bërë të ditur se Türkiye planifikon të krijojë një partneritet me kompaninë italiane të energjisë Eni për një projekt të madh nafte.
Bayraktar tha se vendi po investon në kërkimin e naftës dhe po kërkon partneritete me kompanitë e naftës, përfshirë kompaninë italiane Eni.
“Shpresojmë që së shpejti të bëjmë një njoftim të madh me Eni-n”, tha Bayraktar në aktivitetin për Misionin e Partneritetit Energjetik Itali-Türkiye dhe Takimin për Përputhjen e Bizneseve, të mbajtur në Palazzo di Venezia në Stamboll.
Ai nuk zbuloi hollësi përpara përfundimit të marrëveshjes, por e përshkroi atë si “një projekt të madh”.
Bayraktar tha se bashkëpunimi mes Türkiyes dhe Italisë mund të shtrihet edhe në vende të treta dhe rajone të tjera.
“Nga Afrika në Lindjen e Mesme, nga Lindja e Mesme në Azinë Qendrore, ne mund të zhvillojmë partneritete dhe jemi të gatshëm ta bëjmë këtë”, theksoi ai.
Ai shtoi se Türkiye po zhvillonte projekte të shumta, disa prej të cilave përfshinin kompani italiane.
“Türkiye po i ofron këto projekte jo vetëm për sigurinë tonë të furnizimit, por edhe për sigurinë e furnizimit të Evropës dhe gjithë rajonit”, shtoi ai.
Ministri turk theksoi se kompanitë italiane ishin të përfshira në prodhimin e gazit natyror të Türkiyes në Detin e Zi dhe tha se vendet e BE-së po e shihnin Türkiyen si një burim alternativ gazi ndaj Rusisë.
Ai falënderoi SACE-n, agjencinë italiane të kredive për eksportin, për ndihmën në financimin e projekteve të zhvilluara bashkërisht.
Türkiye dhe Italia tashmë bashkëpunojnë në projekte të mëdha energjetike. Në shtator të vitit 2025, kompania italiane e inxhinierisë Saipem fitoi një kontratë me vlerë rreth 1,5 miliardë dollarë për të ndihmuar në zhvillimin e fazës së tretë të fushës së gazit Sakarya të Türkiyes në Detin e Zi, përfshirë tubacionet që lidhin fushën me bregdetin.
Të dyja vendet janë gjithashtu të lidhura përmes Korridorit Jugor të Gazit, i cili sjell gazin azerbajxhanas përmes Türkiyes drejt Evropës.
