Llogaria rrjedhëse e Türkiye regjistroi suficit neto prej 36 milionë dollarësh në korrik, tregojnë të dhënat e Bankës Qendrore të Republikës së Türkiye të publikuara sot.

Duke përjashtuar arin dhe energjinë, llogaria rrjedhëse shënoi suficit prej 4,97 miliardë dollarësh, ndërsa bilanci i mallrave regjistroi deficit prej 5,58 miliardë dollarësh. Në bazë të të dhënave për 12 muajt e fundit, deficiti i llogarisë rrjedhëse të vendit qëndroi në 40,7 miliardë dollarë deri në korrik ndërsa deficiti i mallrave arriti në 77,2 miliardë dollarë.

Ndërkohë, shërbimet gjeneruan suficit neto prej 63,5 miliardë dollarësh, duke kompensuar pjesërisht deficitet prej 25,2 miliardë dollarësh në të ardhurat parësore dhe 1,9 miliardë dollarësh në të ardhurat dytësore.

Shërbimet mbetën një kontribuues i rëndësishëm në bilancin mujor, duke regjistruar hyrje neto prej 8,23 miliardë dollarësh në korrik; udhëtimet, si pjesë e shërbimeve, gjeneruan të ardhura neto prej 5,97 miliardë dollarësh ndërsa transporti kontribuoi me 2,89 miliardë dollarë.

Në anën e financimit, investimet e portofolit regjistruan hyrje neto prej 5,84 miliardë dollarësh në korrik. Jorezidentët kryen blerje neto prej 1,97 miliardë dollarësh në aksione dhe fonde investimi dhe 2,37 miliardë dollarësh në letra me vlerë të borxhit të brendshëm të qeverisë.

Ata gjithashtu kryen blerje neto të letrave me vlerë të emetuara jashtë vendit nga bankat turke dhe qeveria e përgjithshme, në vlerë përkatësisht 914 milionë dhe 1,71 miliardë dollarë.

Investimet e drejtpërdrejta regjistruan hyrje neto prej 514 milionë dollarësh gjatë muajit. Hyrjet e investimeve të drejtpërdrejta nga jorezidentët arritën në 1,15 miliardë dollarë, ndërsa aktivet e jashtme të rezidentëve u rritën me 640 milionë dollarë.

Rezervat zyrtare të Türkiyes u rritën me 14,25 miliardë dollarë në korrik, treguan gjithashtu të dhënat.