Ministri i Jashtëm i Türkiyes: Bashkëpunimi është kyç ndërsa Siria nis rimëkëmbjen graduale

Ministri i Punëve të Jashtme të Türkiyes, Hakan Fidan, deklaroi të shtunën se bashkëpunimi ndërkombëtar është thelbësor për rimëkëmbjen e Sirisë, pasi investimet po fillojnë ngadalë të rikthehen, pavarësisht shkatërrimit të gjerë të shkaktuar nga vitet e luftës.

Fidan tha për një kanal televiziv lokal se përpjekjet e përbashkëta të vendeve rajonale, si dhe të partnerëve evropianë dhe amerikanë, po ndihmojnë në vendosjen e themeleve për rindërtim, edhe pse mbeten sfida të mëdha.

“Investimet në Siri po fillojnë gradualisht të marrin formë, por përmasat e shkatërrimit janë të mëdha”, tha ai, duke shtuar: “Njerëzit po kthehen dhe atyre që kthehen u nevojitet infrastrukturë që t’u mundësojë të jetojnë dhe të kenë qasje në shërbimet bazë.”

Duke iu përgjigjur kritikave nga Evropa dhe ShBA-ja se administrata aktuale nuk e kontrollon plotësisht Sirinë, Fidan tha se Türkiye beson se kontrolli është vendosur kryesisht, edhe pse disa zona problematike mbeten.

Ai vuri në dukje rajonet nën kontrollin e Forcave Demokratike Siriane (SDF), duke thënë se çështjet e pazgjidhura atje duhet të adresohen në kuadër të marrëveshjes së 10 marsit – një marrëveshje për integrimin e SDF-së në institucionet shtetërore dhe shmangien e konflikteve të mëtejshme.

Fidan e përshkroi gjithashtu Sirinë jugore si një zonë kyç shqetësimi.

“Jugu mund të jetë zona jonë me rrezikun më të madh në këtë moment”, tha ai, duke shtuar se përfshirja e Izraelit e rrit rrezikun dhe kërkon monitorim të kujdesshëm.

Ndërhyrjet ushtarake izraelite janë bërë të shpeshta dhe të dhunshme që nga rrëzimi i Bashar al-Assadit në dhjetor të vitit të kaluar.

Fidan tha se Türkiye po zbaton projekte në Siri dhe theksoi lidhjet e ngushta gjeografike dhe ekonomike mes dy fqinjëve.

“Ekziston një potencial i konsiderueshëm në aspektin e tregtisë, transportit dhe ndërlidhjes. Por së pari, stabiliteti duhet të rikthehet brenda vendit”, tha Fidan.