Von der Leyen: Shkeljet në hapësirën ajrore dhe territorin evropian “nuk do të tolerohen”

Presidentja e Komisionit Evropian, Ursula von der Leyen, të martën deklaroi se BE-ja nuk do të tolerojë asnjë shkelje të hapësirës ajrore apo territorit të saj, duke theksuar angazhimin e bllokut për të forcuar gatishmërinë mbrojtëse.

“Kjo është një provokim. Një kërcënim hibrid që ne nuk mund ta tolerojmë”, tha ajo në një konferencë për shtyp pas Samitit të Këshillit Nordik në Stokholm, duke iu referuar shkeljeve të fundit të hapësirës ajrore të BE-së.

“Nuk do të tolerojmë asnjë shkelje në hapësirën tonë ajrore apo territorin tonë, dhe për këtë arsye ndërtimi i këtij ‘udhërrëfyesi të gatishmërisë’ është me rëndësi jetike”, tha ajo, duke theksuar punën që po bëhet për “udhërrëfyesin e gatishmërisë” të BE-së dhe nismat e reja të mbrojtjes, përfshirë “vëzhgimin e krahut lindor” dhe “murin e dronëve.”

Duke iu referuar Ukrainës, von der Leyen riafirmoi angazhimin afatgjatë të BE-së për ta mbështetur Kievin, përfshirë një propozim për përdorimin e asetesh të ngrira ruse për të ndihmuar në përmbushjen e nevojave financiare të Ukrainës deri në vitin 2027.

“Propozimi është që këto bilance të parave të përdoren për t’i dhënë Ukrainës një hua, që ajo do ta shlyejë nëse Rusia paguan dëmshpërblime. Është një propozim ligjërisht i qëndrueshëm, jo i thjeshtë, por i drejtë… Por mesazhi bazë ndaj Rusisë është shumë i qartë: ne jemi këtu për afat të gjatë. Jemi gati të mbulojmë nevojat financiare të Ukrainës”, tha ajo.

Kryeministri i Suedisë, Ulf Kristersson, që priti samitin, deklaroi se vendet nordike po marrin “përgjegjësi të plotë për sigurinë e tyre”.

“Gjatë takimit sot, ne kemi riafirmuar ambicien tonë për t’u bërë rajoni më i integruar në botë deri në vitin 2030”, tha ai.

Ndërsa kryeministrja e Danimarkës, Mette Frederiksen, paralajmëroi se Evropa po përballet me “kërcënimin më të madh që nga Lufta e Dytë Botërore”, duke thënë se Rusia po përpiqet “të ndajë dhe të dobësojë shoqëritë evropiane.”

“Por ata duhet ta dinë se kurrë nuk do të ia dalin”, shtoi ajo. “Ne duhet të vazhdojmë mbështetjen tonë të fortë për Ukrainën, ajo është vija e parë e mbrojtjes për gjithë Bashkimin Evropian dhe për kontinentin tonë”.

Në samit morën pjesë gjithashtu kryeministri finlandez Petteri Orpo, kryeministri norvegjez Jonas Gahr Støre, dhe kryeministrja e Alandit Katrin Sjögren, me liderët që u përqendruan në bashkëpunimin për sigurinë, mbrojtjen dhe konkurrueshmërinë rajonale.