Irani po avancon me planet për ndërtimin e centraleve bërthamore në pesë lokacione përgjatë vijës së tij bregdetare, si pjesë e përpjekjeve për ta rritur peshën e energjisë bërthamore në prodhimin e energjisë elektrike të vendit, tha të hënën kreu i Organizatës së Energjisë Atomike të Iranit.

Mohammad Eslami, zëvendëspresident i Iranit dhe kreu i Organizatës së Energjisë Atomike, i bëri këto komente gjatë një takimi me anëtarë të komisioneve parlamentare të energjisë dhe ndërtimit, sipas agjencisë shtetërore të lajmeve IRNA.

Eslami tha se projektet po zbatohen në kuadër të dokumentit gjithëpërfshirës strategjik të Iranit për industrinë bërthamore, i prezantuar në vitin 2022.

“Në bazë të këtij dokumenti, ndërtimi i centraleve bërthamore në pesë zona bregdetare është pjesë e planit për të rritur peshën e energjisë bërthamore në portofolin energjetik të vendit dhe këto projekte po përparojnë sipas planifikimit”, tha ai.

Zyrtari iranian tha gjithashtu se Centrali Bërthamor i Bushehrit ka tejkaluar së fundmi prodhimin e 80 miliardë kilovat-orëve energji elektrike, një arritje që sipas tij ka kursyer ekuivalentin e 131 milionë fuçive naftë bruto ose 21,3 miliardë metra kub gaz natyror.

Eslami shtoi se njësia e dytë dhe e tretë e centralit të Bushehrit janë aktualisht në ndërtim e sipër si pjesë e një projekti investimi prej 10 miliardë dollarësh, duke i cilësuar ato si ndër projektet më të mëdha infrastrukturore të vendit.

Bushehri, centrali i vetëm bërthamor funksional i Iranit, ndodhet në bregdetin jugor të Gjirit dhe furnizon me energji rrjetin kombëtar elektrik të vendit.

Tensionet rajonale janë përshkallëzuar që nga fundi i shkurtit, kur ShBA-ja dhe Izraeli nisën sulme ajrore ndaj Iranit.

Mediet iraniane kanë raportuar se centrali i Bushehrit është goditur disa herë gjatë konfliktit, por kanë theksuar se sulmet nuk kanë ndërprerë operacionet dhe nuk kanë ndikuar në prodhimin e energjisë elektrike.

Tensionet u rritën sërish të dielën kur Izraeli bombardoi kryeqytetin libanez, Bejrutin, pavarësisht armëpushimit në fuqi, duke nxitur Iranin të lëshojë raketa drejt veriut të Izraelit, ndërsa Izraeli kreu disa valë sulmesh ajrore kundër Iranit.

Ushtria iraniane tha herët të hënën se po ndalte sulmet ndaj Izraelit, por paralajmëroi për një përgjigje “shkatërruese” nëse sulmet izraelite ndaj Libanit do të vazhdonin.

Mediet izraelite, duke cituar zyrtarë anonimë, raportuan se Izraeli ka rënë dakord t’i ndalojë sulmet ajrore ndaj Iranit, por do ta vazhdojë ofensivën e tij në jug të Libanit.