Presidenti i Kolumbisë, Petro: Trump planifikoi operacion ushtarak ndaj Kolumbisë

Presidenti amerikan Donald Trump ka qenë në përgatitje të një operacioni ushtarak ndaj Kolumbisë, tha presidenti kolumbian Gustavo Petro për të përditshmen spanjolle “El Pais”.

“Trump më tha: Ja çfarë duhet të dini për Kolumbinë. Mesazhi ishte se ata tashmë po përgatiteshin, po planifikonin një operacion ushtarak”, tha Petro.

Megjithatë, udhëheqësi kolumbian i krahut të majtë tha se beson që kërcënimi ishte “i ngrirë” pas telefonatës të së mërkurës, ndërsa pranoi gjithashtu se “mund të gabohem”.

“Çdo president, kudo në botë, mund të shkarkohet. Kjo më shqetëson”, tha Petro, duke shtuar se ka frikë se do të pësojë të njëjtin fat si udhëheqësi venezuelian, Nicolas Maduro, i cili u kap nga forcat amerikane në Karakas fundjavën e kaluar.

Petro shpjegoi se Kolumbisë i mungojnë aftësitë e mbrojtjes ajrore, por ka bërë thirrje për rezistencë popullore. Ai tha se foli me Trumpin për rreth një orë të mërkurën, gjatë së cilës arriti të paraqiste pikëpamjet e tij.

“(Trump) është nën presionin e shtetit të Floridës, ku është i përqendruar krahu më radikal republikan. Ajo opozitë gënjen për luftën kundër trafikut të drogës”, tha ai.

Petro tha se Trump e kuptonte këtë, duke theksuar se “për këtë arsye nuk mungojnë viktimat e gënjeshtrave”, dhe duke kërkuar përmirësimin e komunikimit për të shmangur keqkuptimet në të ardhmen.

– Mendime mbi Venezuelën

Petro i tha “El Pais”-it se është mik i presidentes në detyrë të Venezuelës, Delcy Rodríguez.

Të shtunën, Trump tha se zyrtarët e lartë amerikanë po kontrollonin qeverinë venezueliane. Megjithatë, Rodríguez deklaroi se “asnjë agjent i huaj” nuk po e drejton vendin.

Petro tha se detyra e saj kryesore duhet të jetë bashkimi i popullit venezuelian. 

“Nëse ata bashkohen dhe kërkojnë një rrugëdalje politike nga problemi i dukshëm me të cilin përballen, ata mund të ecin përpara”, tha Petro.

“Ajo që është më e rëndësishme është se veprimet e ShBA-së ndaj vendeve sovrane mund të çojnë në një ‘luftë botërore’.

Çështja nuk është Venezuela, çështja është Kina. ShBA-ja i frikësohet konkurrencës me Kinën dhe kërkon energji për të konkurruar në aspektin tregtar, por kjo do të çojë në luftë”, tha Petro.

.