Presidenti i Türkiyes, Recep Tayyip Erdoğan, shprehu të dielën ngushëllime për vdekjen e ish-emirit të Katarit, Sheikh Hamad bin Khalifa Al Thani, në moshën 74-vjeçare.

Në një mesazh të publikuar në llogarinë e tij në NSosyal, Erdoğan e përshkroi Sheikh Hamadin si “mik të ngushtë” dhe theksoi rolin e tij në forcimin e marrëdhënieve mes Türkiyes dhe Katarit.

Erdoğan tha se kishte punuar krah për krah me ish-emirin në skenën ndërkombëtare gjatë viteve kur ishte kryeministër dhe se i kishte dëshmuar personalisht përpjekjet e tij për ta promovuar stabilitetin në rajon, paqen në botën islame dhe mirëqenien e popullit të Katarit.

“Mësova me pikëllim të madh për ndarjen nga jeta të mikut tim shumë të dashur, Emirit Atë të Shtetit të Katarit, Sheikh Hamad bin Khalifa Al Thani”, tha Erdoğan.

Presidenti turk vlerësoi Sheikh Hamadin për kontributin e madh në zhvillimin e marrëdhënieve politike, tregtare, ushtarake, kulturore dhe njerëzore mes dy vendeve.

Erdoğan bëri lutje për ish-emirin e ndjerë dhe i shprehu ngushëllime udhëheqësit aktual të Katarit, Sheikh Tamim bin Hamad Al Thani, si dhe familjes Al Thani, popullit të Katarit dhe mbarë botës islame.

“Në emrin tim, të familjes sime dhe të kombit tim, i përcjell ngushëllimet vëllait tim të dashur, emirit të Katarit, Sheikh Tamim bin Hamad Al Thani, familjes së Emirit Atë të ndjerë, popullit mik dhe vëllazëror të Katarit dhe botës islame”, tha ai.

Sheikh Hamad e udhëhoqi Katarin nga viti 1995 deri në vitin 2013, kur ia transferoi pushtetin të birit, Sheikh Tamim. Katari njoftoi vdekjen e tij të dielën.