Ministri për Evropën dhe Punët e Jashtme i Shqipërisë, Ferit Hoxha ka deklaruar se mirëpresin angazhimin e Greqisë që zgjerimi i Bashkimit Evropian (BE) të mbetet një përparësi kyçe evropiane.

Ministri Hoxha është takuar me ministrin grek të Punëve të Jashtme, George Gerapetritis në margjinat e Forumit Ekonomik të Delphit në Greqi. Në një reagim në rrjetet sociale, Hoxha ka theksuar se takimi është realizuar për të vazhduar "dialogun konstruktiv dhe me vizion mbi marrëdhëniet shqiptaro-greke".

"Duke u bazuar në takimin e mbajtur më herët sot në Athinë midis kryeministrave tanë (Edi Rama dhe Kyriakos Mitsotakis), ne riafirmuam angazhimin tonë të përbashkët për të çuar përpara bashkëpunimin dypalësh në një frymë besimi të ndërsjellë, fqinjësie të mirë dhe partneriteti strategjik, të ankoruar fort në të ardhmen tonë të përbashkët evropiane dhe solidaritetin e aleatëve në NATO", tha Hoxha.

Kryediplomati i Shqipërisë theksoi ranë dakord të shfrytëzojmë plotësisht çdo mundësi për të intensifikuar dialogun politik dhe për të zgjeruar bashkëpunimin ekonomik, veçanërisht në energji, infrastrukturë dhe turizëm, "duke promovuar njëkohësisht lidhshmëri më të madhe dhe shkëmbime midis njerëzve".

"Ne ramë dakord të angazhohemi në mënyrë aktive dhe konkrete në të gjitha nivelet, me ekipe të përkushtuara, për të adresuar çështjet e pazgjidhura dhe për të punuar drejt zgjidhjeve të balancuara dhe të qëndrueshme në interes të të dy vendeve tona dhe qytetarëve tanë, duke hapur një kapitull të ri në marrëdhëniet tona dypalëshe. Zhbllokimi i potencialit të plotë të partneritetit tonë është, në vetvete, një investim i drejtpërdrejtë në miqësinë dhe bashkëpunimin dypalësh, por edhe në stabilitetin, prosperitetin dhe një të ardhme të përbashkët evropiane për rajonin tonë", është shprehur Hoxha.

Hoxha ka shtuar se gjithashtu ai shprehu vlerësimin për mbështetjen e vazhdueshme të Greqisë për pranimin e Shqipërisë në BE dhe për avokimin e saj të vazhdueshëm të zgjerimit në Ballkanin Perëndimor, "duke përfshirë edhe mbajtjen e saj lart në agjendën e Forumit Delphi të këtij viti".

"Ne mirëpresim angazhimin e Greqisë për të punuar ngushtë me Presidencat e ardhshme të BE-së, të Irlandës dhe Lituanisë për të siguruar që zgjerimi të mbetet një përparësi kyçe evropiane", ka theksuar Hoxha.

Ministri për Evropën dhe Punët e Jashtme, Ferit Hoxha po merr pjesë në Forumin Ekonomik të Delfit që zhvillohet në Greqi.