Dhjetë persona u plagosën të hënën në rajonin e Moskës, pasi qindra dronë ukrainas u drejtuan drejt kryeqytetit rus, pretenduan autoritetet lokale.

Kryebashkiaku i Moskës, Sergey Sobyanin, deklaroi në Telegram se Ukraina lëshoi gjatë natës më shumë se 400 dronë drejt rajonit të Moskës. Sipas tij, shumica u kapën në periferi të kryeqytetit, përfshirë 85 dronë që u rrëzuan ndërsa po i afroheshin Moskës.

Agjencia shtetërore e lajmeve TASS e përshkroi sulmin si “një nga më të mëdhenjtë” të kryer nga Ukraina ndaj kryeqytetit rus gjatë viteve të fundit.

Guvernatori i rajonit të Moskës, Andrey Vorobyov, njoftoi në platformën ruse të mediave sociale Max se 10 persona u plagosën, mes tyre edhe tre shtetas kinezë.

Ai tha se sistemet e mbrojtjes ajrore dhe të luftës elektronike e zmbrapsën sulmin, ndërsa dëmet kryesore u raportuan në distriktet Podolsk, Domodedovo dhe Odintsovo.

Sipas tij, mbetjet e dronëve dëmtuan disa banesa private, shkaktuan zjarre dhe dëmtuan infrastrukturën civile.

Kanalet ukrainase të monitorimit thanë se sulmet goditën qendrën më të madhe logjistike të kompanisë Wildberries në fshatin Koledino, parkun logjistik Yuzhnye Vorota në distriktin Domodedovo dhe një depo nafte në vendbanimin Lvovsky, në rajonin e Moskës.

Drejtuesja e distriktit të qytetit Domodedovo, Evgeniya Khurstaleva, konfirmoi në Telegram sulmin ndaj Yuzhnye Vorota, duke thënë se në zonë shpërtheu zjarr.

Veçmas, Ministria ruse e Mbrojtjes pretendoi se forcat e saj rrëzuan 381 dronë ukrainas mbi territorin e vendit, Krimenë e aneksuar dhe ujërat e Detit Azov dhe Detit të Zi.

Ndërkohë, Forcat Ajrore të Ukrainës akuzuan Rusinë se gjatë natës lëshoi dy raketa ajrore të drejtuara dhe 94 dronë. Sipas tyre, mbrojtja ajrore shkatërroi ose neutralizoi 81 dronë mbi pjesët veriore, jugore dhe lindore të Ukrainës.

Verifikimi i pavarur i këtyre pretendimeve mbetet i vështirë për shkak të luftës në vazhdim.