Bashkimi Evropian shprehu të mërkurën shqetësimin për intensifikimin e sulmeve ushtarake të Izraelit në territorin sirian, duke u bërë thirrje të gjithë aktorëve të jashtëm ta respektojnë plotësisht sovranitetin dhe integritetin territorial të Sirisë.

Në një deklaratë, zëdhënësi i BE-së, Anouar El Anouni, tha: “BE-ja është e alarmuar nga përleshjet e vazhdueshme në Suwayda, të cilat kanë shkaktuar shumë viktima, dhe dënon fuqishëm dhunën e raportuar ndaj civilëve.”

“Autoritetet kalimtare kanë përgjegjësinë të de-përshkallëzojnë situatën dhe të rivendosin qetësinë, të sigurojnë llogaridhënie për të gjitha krimet dhe të ecin përpara me një tranzicion gjithëpërfshirës”, tha zëdhënësi, duke shtuar se BE-ja është e gatshme të mbështesë këto përpjekje.

“Duke pasur parasysh përshkallëzimin e sulmeve të Izraelit në territorin sirian, ne u bëjmë thirrje të gjithë aktorëve të jashtëm ta respektojnë plotësisht sovranitetin dhe integritetin territorial të Sirisë”, shtoi ai.

Izraeli rinovoi sulmet ajrore në Suwayda, në jug të Sirisë, të mërkurën, në shkeljen më të fundit të sovranitetit të vendit. Tel Avivi pretendon se këto sulme kanë për qëllim mbrojtjen e komunitetit druzi në Siri.

Ndërkohë, të paktën dy persona u plagosën në një sulm ajror izraelit që kishte në shënjestër Kompleksin e Shtabit të Përgjithshëm të ushtrisë siriane në Damask të mërkurën, raportoi agjencia shtetërore e lajmeve SANA.

Sulmet ndodhën ndërsa ushtria siriane kishte dislokuar forca në provincë për ta rivendosur sigurinë dhe për të mbrojtur civilët dhe pronat e tyre, pas përleshjeve mes grupeve të armatosura druzi dhe beduinë që lanë të paktën 30 persona të vdekur.