Forca e Përkohshme e OKB-së në Liban (UNIFIL) tha se një kolonë e saj që transportonte paqeruajtës ushtarakë dhe civilë, si dhe kontraktorë nga Bejruti drejt selisë së saj në Naqoura, u ndalua nga ushtria izraelite të martën pasdite, vetëm disa kilometra larg destinacionit. 

UNIFIL-i njoftoi se automjetet me shenja të OKB-së u lejuan më vonë të vazhdonin rrugën, por kontraktorët lokalë u kthyen në Bejrut nën masa sigurie, pavarësisht koordinimit paraprak që përfshinte praninë e tyre.

“Ky nuk është një incident i izoluar. Kufizime të ngjashme përmes bllokadave fizike në rrugë ose anulimit të lejeve të mëparshme kanë prekur si paqeruajtësit ashtu edhe personelin thelbësor që i mbështet ata. Këto veprime ngrenë shqetësime lidhur me dërgimin në kohë të furnizimeve kritike, përfshirë ushqimin, karburantin dhe ujin, në pozicionet e UNIFIL-it, veçanërisht përgjatë Vijës Blu”, thuhet më tej.

Teksa këto sfida janë menaxhuar deri tani, paqeruajtësit thonë se kufizimet e vazhdueshme të lëvizjes rrezikojnë të dëmtojnë operacionet, përfshirë aftësinë e paqeruajtësve për të raportuar mbi shkeljet e Rezolutës 1701 të Këshillit të Sigurimit të OKB-së.

UNIFIL-i përsëriti thirrjen e saj ndaj ushtrisë izraelite për të respektuar marrëveshjet ekzistuese, për të siguruar mbrojtjen dhe sigurinë e paqeruajtësve dhe për të garantuar lirinë e lëvizjes për të gjitha patrullat dhe kolonat logjistike.