Qeveria izraelite njoftoi të enjten se marrëveshja e armëpushimit në Gaza do të hyjë në fuqi brenda 24 orëve nga miratimi i saj.

Zëdhënësja e qeverisë, Shosh Bedrosian, tha në një konferencë për shtyp se Kabineti i Sigurisë i Izraelit do të mblidhet mbrëmjen e sotme për të votuar mbi marrëveshjen, pas së cilës do të mbahet edhe një mbledhje e plotë e qeverisë.

“Brenda 24 orëve nga mbledhja e kabinetit, armëpushimi në Gaza do të fillojë,” tha ajo, pa përmendur një orë të saktë për zbatimin e tij.

“Sipas planit, ushtria izraelite do të ripozicionohet në vijën e verdhë, siç përcaktohet në hartat e shpërndara, dhe pas kësaj periudhe 24-orëshe do të fillojë një dritare 72-orëshe, gjatë së cilës të gjithë pengjet tanë do të lirohen dhe do të kthehen në Izrael”.

Ajo shtoi se, pasi ushtria izraelite të tërhiqet në vijën e verdhë, në përputhje me marrëveshjen, do të vazhdojë të mbajë nën kontroll rreth 53 për qind të territorit të Rripit të Gazës.

Vija e verdhë i referohet vijës së parë të tërheqjes të përcaktuar në planin e armëpushimit në Gaza të Presidentit amerikan Donald Trump.

“Faza e parë është shumë e qartë,” vijoi ajo. “Të gjitha pengjet tona, të gjallë dhe të vdekur, do të lirohen pas 72 orësh, që do të thotë se Izraeli po përgatitet t’i presë ato të hënën”.