Macron: Përparim në garancitë e sigurisë për Ukrainën
Po përparojmë në ndërtimin e garancive të sigurisë që do të jenë kyçe për një paqe të drejtë dhe të qëndrueshme, deklaroi presidenti francez
Presidenti francez Emmanuel Macron deklaroi herët të hënën se është arritur përparim në lidhje me garancitë e sigurisë për Ukrainën, pas bisedimeve me presidentin amerikan Donald Trump dhe presidentin ukrainas Volodymyr Zelenskyy.
“Po përparojmë në ndërtimin e garancive të sigurisë që do të jenë qendrore për ndërtimin e një paqeje të drejtë dhe të qëndrueshme”, shkroi Macron në rrjetin social X.
Ai gjithashtu konfirmoi se liderët e Koalicionit të të Vullnetshmëve do të mblidhen në Paris në fillim të muajit janar, “për të finalizuar kontributet konkrete të secilit shtet”.
Trump, Zelenskyy dhe liderët evropianë zhvilluan të dielën një bisedë telefonike lidhur me “hapat konkretë” për përfundimin e luftës mes Rusisë dhe Ukrainës.
Biseda, e cila zgjati më shumë se një orë dhe pasoi takimin mes Trumpit dhe Zelenskyyt, përfshiu Macronin, kryeministrin britanik Keir Starmer, kancelarin gjerman Friedrich Merz, kryeministren italiane Giorgia Meloni, presidentin finlandez Alexander Stubb, presidentin polak Karol Nawrocki, kryeministrin norvegjez Jonas Gahr Støre, sekretarin e përgjithshëm të NATO-s Mark Rutte, si dhe presidenten e Komisionit Evropian, Ursula von der Leyen.
Trump e priti Zelenskyyn në rezidencën e tij Mar-a-Lago në Palm Beach, Florida, ku diskutuan planin amerikan për t’i dhënë fund konfliktit që po vazhdon prej gati katër vitesh.
Presidenti ukrainas mbërriti në Shtetet e Bashkuara të dielën, pas një vizite në Kanadanë fqinje.