Të paktën 66.148 palestinezë janë vrarë në luftën gjenocidale të Izraelit kundër Rripit të Gazës që nga tetori 2023, tha të mërkurën Ministria e Shëndetësisë.
Një deklaratë e ministrisë tha se 51 trupa u sollën në spitale gjatë 24 orëve të fundit, ndërsa 180 persona u plagosën, duke e çuar numrin e të plagosurve në 168,716 nga ofensiva izraelite.
“Shumë viktima ende ndodhen nën rrënoja dhe në rrugë, pasi shpëtimtarët nuk arrijnë t’i nxjerrin,” thuhet në njoftim.
Po ashtu u bë e ditur se katër palestinezë u vranë dhe 57 të tjerë u plagosën nga ushtria izraelite gjatë përpjekjes për të marrë ndihma humanitare në 24 orët e fundit, duke e çuar në 2.580 numrin e palestinezëve të vrarë ndërsa kërkonin ndihmë, me mbi 18.930 të plagosur që nga 27 maji.
Ushtria izraelite rifilloi sulmet ndaj Gazës më 18 mars dhe që atëherë ka vrarë 13.280 persona dhe plagosur 56.675 të tjerë, duke thyer armëpushimin dhe marrëveshjen për shkëmbim të të burgosurve që kishte hyrë në fuqi në janar.
Ministria tha se dy persona, mes tyre një fëmijë, vdiqën nga uria në 24 orët e fundit, duke e çuar në 455 numrin e vdekjeve nga uria që nga tetori 2023, përfshirë 151 fëmijë.
Sipas ministrisë, 177 persona, mes tyre 36 fëmijë, kanë vdekur nga uria që kur Klasifikimi i Integruar i Fazave të Sigurisë Ushqimore (IPC), i mbështetur nga OKB-ja, shpalli urinë në Gaza këtë gusht.
Më 22 gusht, IPC shpalli urinë në qytetin e Gazës dhe paralajmëroi se ajo do të përhapet në pjesën qendrore dhe jugore të saj deri në fund të shtatorit.
Izraeli ka mbajtur të mbyllura të gjitha pikat kufitare me Gazën që nga 2 marsi, duke bllokuar ndihmat humanitare dhe duke e shtyrë enklavën drejt urisë, megjithëse kamionët e ndihmave janë grumbulluar në kufi.
Izraeli lejon herë pas here sasi shumë të kufizuara ndihmash të hyjnë, por ato dërgesa nuk mjaftojnë për nevojat bazë dhe nuk e kanë ndalur urinë. Shumica e kamionëve janë plaçkitur nga banda që administrata e Gazës akuzon se mbrohen nga Izraeli.
Bombardimet e pandërprera të Izraelit ndaj Gazës që nga tetori 2023 e kanë bërë enklavën të pabanueshme dhe kanë shkaktuar uri masive e përhapje sëmundjesh.
