Policia e Malit të Zi, në bashkëpunim me Agjencinë e Sigurisë Kombëtare (ANB), nisi sot në mëngjes një operacion që kishte në shënjestër persona të dyshuar për lidhje me rrjetin rus të informacionit "Rybar", dhe 5 persona u arrestuan në Risan, raportuan mediat malazeze. 

Mes të arrestuarve janë Mihail dhe Valeria Zvinchuk, të cilët thuhet se janë figura kyçe në rrjet si dhe tre bashkëpunëtorë të tyre, raporton Radio-Televizioni i Malit të Zi (RTCG), duke iu referuar burimeve të njohura me operacionin.

Gazeta "Pobjeda" me bazë në Podgoricë, duke iu referuar informacioneve nga sektori i sigurisë, raporton se Mihail Zvinchuk është kolonel në agjencinë ruse të inteligjencës ushtarake (GRU), përgjegjës për operacionet hibride. Këto pretendime nuk mund të verifikohen në mënyrë të pavarur për momentin.

"Rybar" është një rrjet rus mediash dhe informacioni, i themeluar në vitin 2018, i cili fitoi njohje ndërkombëtare gjatë pushtimit rus të Ukrainës. Fillimisht i përqendruar te analizat ushtarake dhe raportimi mbi konfliktin, ai më vonë evoluoi në një rrjet kanalesh komunikimi.

Sipas raportimeve të mediave malazeze, institucionet perëndimore e lidhin këtë rrjet me përhapjen e narrativave pro-ruse, aktiviteteve propagandistike dhe operacioneve të ndikimit përmes informacionit.

Institucionet malazeze ende nuk kanë dhënë detaje të mëtejshme lidhur me arrestimet, e as nuk kanë bërë të ditura veprat specifike penale për të cilat akuzohen të dyshuarit.