Nën mikpritjen e ministrit të Jashtëm Hakan Fidan, një mbledhje joformale e Këshillit të Ministrave të Jashtëm të Organizatës së Shteteve Turke (OTS) do të mbahet të shtunën në Istanbul.

Sipas burimeve diplomatike turke, në takim do të marrin pjesë përfaqësues nga Türkiye, Azerbajxhani, që aktualisht kryeson OTS-në, si dhe nga vendet anëtare Kazakistani, Kirgistani dhe Uzbekistani, ndërsa zhvillimet e fundit, si dhe çështjet globale dhe rajonale, pritet të jenë në fokus.

Në margjinat e takimit, Fidan pritet të zhvillojë bisedime dypalëshe me homologët e tij, ndërsa krerët e delegacioneve pjesëmarrëse pritet të priten së bashku nga Presidenti i Türkiyes, Recep Tayyip Erdoğan.

Burimet thonë se Fidan do të mbajë një fjalim gjatë takimit, ku pritet të theksojë rëndësinë e zgjerimit të bashkëpunimit ndërmjet vendeve të OTS-së.

Fidan pritet gjithashtu të tërheqë vëmendjen mbi rëndësinë që bota turke të mbajë një qëndrim të përbashkët në përpjekjet diplomatike për t’i dhënë fund sa më shpejt konfliktit të vazhdueshëm midis ShBA-së dhe Izraelit me Iranin, si dhe ndaj sulmeve që synojnë vende të treta.

Këshilli i Bashkëpunimit të Shteteve Turqishtfolëse u themelua në bazë të Marrëveshjes së Nakhçivanit, e nënshkruar midis Türkiye, Azerbajxhanit, Kazakistanit dhe Kirgistanit më 3 tetor 2009. Organizata u riemërua “Organizata e Shteteve Turke” (OTS) në Samitin e Istanbulit në vitin 2021.