Presidenti rus, Vladimir Putin, deklaroi se marrëdhëniet mes Moskës dhe Pekinit kanë arritur një “nivel të paprecedentë” dhe theksoi se miqësia mes dy vendeve “nuk është e drejtuar kundër askujt”, përpara vizitës së tij në Kinë, sipas deklaratave të publikuara të martën nga agjencia shtetërore ruse e lajmeve TASS.

Në një videomesazh të publikuar para udhëtimit të tij në Pekin, Putini tha se Rusia dhe Kina janë të përkushtuara për zgjerimin e bashkëpunimit në politikë, ekonomi, mbrojtje dhe shkëmbime humanitare.

“Miqësia jonë nuk është e drejtuar kundër askujt”, tha Putini, duke shtuar se lidhjet mes dy vendeve bazohen në “mirëkuptim dhe besim të ndërsjellë”, si dhe në mbështetjen për interesat thelbësore të njëri-tjetrit, përfshirë sovranitetin dhe unitetin shtetëror.

Putini tha se po udhëton drejt Pekinit me ftesë të presidentit kinez, Xi Jinping, të cilin e përshkroi si “mik të mirë prej kohësh”, duke shtuar se kontaktet e rregullta në nivel të lartë janë jetike për thellimin e marrëdhënieve dypalëshe.

Ai tha se dy vendet kanë ndërtuar një “marrëdhënie vërtet strategjike dhe partneritet gjithëpërfshirës” që prej nënshkrimit të Traktatit për Fqinjësi të Mirë dhe Bashkëpunim Miqësor 25 vite më parë.

“Natyra e tyre e veçantë reflektohet në atmosferën e mirëkuptimit dhe besimit të ndërsjellë, në përkushtimin për bashkëpunim të drejtë dhe me përfitim të ndërsjellë, zhvillimin e dialogut me respekt dhe mbështetjen për njëri-tjetrin në çështje që prekin interesat thelbësore të të dy vendeve, përfshirë mbrojtjen e sovranitetit dhe unitetit shtetëror”, tha Putin.

Putini vlerësoi gjithashtu bashkëpunimin ekonomik, duke thënë se tregtia dypalëshe ka tejkaluar 200 miliardë dollarë dhe se pagesat tani kryhen “pothuajse tërësisht në rubla dhe juanë”.

Ai mirëpriti gjithashtu vendosjen e regjimit pa viza mes dy vendeve, duke thënë se kjo do të nxisë turizmin, udhëtimet e biznesit dhe shkëmbimet mes qytetarëve.

Presidenti rus shtoi se Moska vlerëson shumë historinë dhe kulturën kineze dhe synon të thellojë lidhjet humanitare dhe kulturore mes dy vendeve.