Aktif Bank është bërë banka e parë turke që merr pjesë në Sistemin Ndërbankar të Pagesave Ndërkufitare të Kinës (CIPS), pas një marrëveshjeje të nënshkruar së fundmi në Panairin Ndërkombëtar të Kinës për Investime dhe Tregti (CIFIT).

Sistemi mundëson kryerjen e pagesave dhe shlyerjeve ndërkombëtare në juan kinez, duke eliminuar diferencat në kohë dhe kosto që kërkojnë konvertimet tradicionale ndërmjet monedhave. Kjo pritet t’u sjellë përfitime bizneseve të vogla dhe të mesme (NVM) turke, krahas kompanive të mëdha, tha për Anadolu drejtori i përgjithshëm i bankës.

Aysegul Adaca Ogan, e cila foli në kuadër të aktivitetit, deklaroi se kjo platformë relativisht e re është zhvilluar nga Banka Popullore e Kinës (PBoC) dhe gjatë pesë viteve të fundit është zgjeruar, me banka të huaja që marrin pjesë në këtë sistem, i cili u shërben më shumë se 1.800 bankave.

Ajo vuri në dukje se pagesat në juan përmes CIPS u rritën në 28 për qind të vëllimit të tregtisë së jashtme të Kinës, që gjatë pesë viteve të fundit arriti në 6 trilionë dollarë, ndërsa vëllimi i tregtisë ndërmjet Türkiyes dhe Kinës u rrit nga 25 miliardë në 50 miliardë dollarë gjatë së njëjtës periudhë.

“Me rritjen e pagesave në juan në tregtinë e jashtme të Kinës dhe kërkesën në rritje për sisteme pagesash në juan në Türkiye, bashkimi me këtë platformë ishte një mundësi e vlefshme për ne”, tha ajo.

Ogan deklaroi se Aktif Bank do të hapë platformën e saj të bankimit digjiital për t’u mundësuar NVM-ve të kryejnë pagesa përmes CIPS.

“Ne kemi mbi 1.300 banka në mbarë botën dhe duam ta zgjerojmë korridorin tonë për të përfshirë rajone si Kina, pas Evropës dhe Amerikës, pasi kemi ndjekur nga afër mundësitë në tregun kinez”, tha ajo.

“Ne jemi e vetmja bankë turke në pavijonin e panairit dhe prania jonë këtu sot është një hap i rëndësishëm në strategjinë tonë afatgjatë”, shtoi ajo.