Forcat speciale amerikane kanë shpëtuar të shtunën anëtarin e dytë të ekuipazhit të një avioni luftarak “F-15” të rrëzuar mbi Iran, raportoi portali “Axios” duke cituar tre zyrtarë amerikanë.
Operacioni i shpëtimit përmbylli një mision të tensionuar 36-orësh në jugperëndim të Iranit, ku forcat amerikane dhe Garda Revolucionare e Iranit (IRGC) thuhet se po përpiqeshin të arrinin te oficeri amerikan i zhdukur.
Me këtë ndërhyrje të fundit, të dy anëtarët e ekuipazhit janë shpëtuar.
Një zyrtar amerikan tha se misioni u realizua nga një njësi elitare komandosh, e mbështetur nga një prani e gjerë ajrore, dhe i gjithë personeli amerikan i përfshirë është larguar tashmë nga Irani.
Dy burime thanë se piloti dhe oficeri i sistemeve të armëve arritën të komunikonin pasi u hodhën me parashutë nga avioni.
Piloti u gjet dhe u shpëtua brenda disa orësh pas rrëzimit të avionit, ndërsa anëtari i dytë i ekuipazhit u lokalizua një ditë më vonë.
Forcat speciale amerikane u dislokuan brenda Iranit të premten dhe sërish të shtunën si pjesë e operacionit të kërkim-shpëtimit.
Pasi u lokalizua edhe anëtari i dytë të shtunën, forcat amerikane nisën një operacion për ta nxjerrë, ndërkohë që njësi të IRGC-së po lëviznin drejt zonës, me sa duket për të penguar misionin.
Sipas burimeve, avionë të Forcave Ajrore të ShBA-së goditën forcat iraniane për t’i ndalur të arrinin në vendngjarje.
Gazeta “The New York Times” raportoi se pas shpëtimit të oficerit të armëve, dy avionë transporti të destinuar për evakuimin e komandove dhe aviatorëve mbetën të bllokuar në një bazë të largët në Iran.
Në përgjigje, komandantët dërguan tre avionë zëvendësues për të nxjerrë të gjithë personelin dhe shkatërruan avionët e dëmtuar për të mos rënë në duart e Iranit.
Presidenti amerikan, Donald Trump dhe anëtarë të lartë të administratës së tij e ndoqën operacionin nga Salla e Situatave në Shtëpinë e Bardhë.
Gjatë operacionit për shpëtimin e pilotit të premten, një sulm iranian goditi një helikopter amerikan “Black Hawk” të përfshirë në mision.
Edhe pse disa pjesëtarë të ekuipazhit u plagosën, helikopteri arriti të vazhdonte fluturimin.
