Ministri i Mbrojtjes Kombëtare i Türkiyes tha të premten se siguria e Kaukazit nuk mund të trajtohet veçmas nga siguria e Türkiyes, Azerbajxhanit dhe Gjeorgjisë, duke theksuar rëndësinë e bashkëpunimit trepalësh për paqen dhe stabilitetin rajonal.

Duke shprehur kënaqësinë që ndodhej në qytetin azerbajxhanas të Shushas, të cilin e cilësoi si zemrën e kulturës së vendit, për një takim trepalësh të ministrave të Mbrojtjes, Yaşar Güler tha se Türkiye, Azerbajxhani dhe Gjeorgjia janë tri vende mike dhe fqinje, të lidhura nga një histori dhe gjeografi e përbashkët, besimi reciprok dhe lidhje të forta miqësie.

Ai tha se marrëdhëniet e forta mes tri vendeve janë zhvilluar në një bashkëpunim strategjik gjithnjë e më të thellë dhe shumëdimensional, ndërsa Kaukazi i Jugut po kalon një transformim të rëndësishëm.

Duke theksuar se Türkiye i mirëpret zhvillimet e fundit drejt vendosjes së paqes mes Azerbajxhanit dhe Armenisë, Güler tha:

“Besojmë se kjo epokë e re do të krijojë mundësi të reja bashkëpunimi në Kaukazin e Jugut përmes përpjekjeve të përbashkëta të vendeve të rajonit.”

“Bashkëpunimi Türkiye-Azerbajxhan-Gjeorgji ka një rëndësi të veçantë në këtë drejtim”, shtoi ai.

Güler tha se projektet ekzistuese në fushën e energjisë, transportit dhe komunikimit mes tri vendeve kontribuojnë jo vetëm në zhvillimin ekonomik, por edhe në sigurinë dhe stabilitetin rajonal.

“Garantimi i sigurisë së këtyre projekteve është përgjegjësi e përbashkët e vendeve tona”, tha ai.

Sipas Gülerit, stërvitjet e përbashkëta ushtarake, trajnimet dhe shkëmbimi i përvojave mes forcave të armatosura të tri vendeve janë pasqyrim konkret i kësaj përgjegjësie.

“Siguria e Kaukazit nuk mund të konsiderohet e ndarë nga siguria e Türkiyes, Azerbajxhanit dhe Gjeorgjisë”, tha ai.

“Me këtë qasje, dua të shpreh edhe një herë mbështetjen tonë të fuqishme për pavarësinë dhe integritetin territorial të Gjeorgjisë dhe Azerbajxhanit”, tha Güler, duke shtuar:

“Në periudhën e ardhshme jemi të gatshëm ta çojmë më tej besimin dhe solidaritetin ekzistues mes tri vendeve tona, në një mënyrë që t’i shërbejë paqes, sigurisë, stabilitetit dhe prosperitetit në Kaukaz.”

Gjatë qëndrimit në Shusha, Güler zhvilloi edhe takime të veçanta dypalëshe me ministrin e Mbrojtjes së Azerbajxhanit, gjeneral Zakir Hasanov, si dhe me zëvendëskryeministrin dhe ministrin e Mbrojtjes të Gjeorgjisë, Irakli Chikovani.

Sipas Ministrisë së Mbrojtjes Kombëtare të Türkiyes, Güler dhe Hasanov u takuan para mbledhjes trepalëshe.

Güler gjithashtu u takua me Chikovanin në kuadër të vizitës së tij në Shusha për takimin trepalësh të ministrave të Mbrojtjes.