Numri i të pastrehëve në Angli është rritur ndjeshëm gjatë vitit të kaluar, sipas një raporti të ri që paralajmëron se autoritetet lokale po e kanë gjithnjë e më të vështirë të përballojnë kërkesat në rritje dhe presionin financiar.

Raporti “Homelessness Monitor England 2025” i publikuar nga organizata bamirëse britanike Crisis zbulon se numri i njerëzve që flenë në rrugë është rritur me 20% gjatë vitit të fundit, duke arritur në 4.667 – gati dyfishi i nivelit më të ulët të regjistruar gjatë pandemisë së COVID-19.

Më shumë se gjysma e njerëzve që flenë jashtë në Londër tani janë shtetas jo-britanikë, çka pasqyron një rritje të aplikimeve për azil dhe përpjekjet për të përshpejtuar shqyrtimin e dosjeve, thuhet në raport.

Në vitin 2024, 330.000 familje u vlerësuan nga këshillat bashkiake – autoritetet lokale përgjegjëse për shërbimet publike – si të pastrehë ose në rrezik për t’u bërë të tilla, një rritje prej 4% brenda një viti dhe 21% gjatë tre viteve.

Rastet në Londër u rritën shumë më shpejt, me 7% shtim në mesin e atyre që janë në rrezik dhe 27% ndër ata që tashmë janë të pastrehë. Rreth 70% e autoriteteve lokale raportuan se kërkesa për shërbime për të pastrehët është rritur.

Studimi gjeti rritje të theksuara të rasteve të pastrehësisë për shkak të dëbimeve nga akomodimet e Ministrisë së Brendshme për azilkërkuesit – një rritje prej 37% – si dhe ndër personat që lënë institucione si burgjet apo spitalet, që u shtuan me 22%.

Numri i rasteve të lidhura me dhunën në familje është rritur gjithashtu me 14% që nga viti 2021, pas hyrjes në fuqi të mbrojtjeve të reja ligjore për viktimat.

Në të njëjtën kohë, efektiviteti i sistemit në zgjidhjen e rasteve të pastrehësisë është ulur: rastet ku është siguruar akomodim kanë rënë nga 47% në vitin 2021 në 39% në vitin 2024.

Raporti përfundon se sistemi i strehimit në Angli është “nën presion të jashtëzakonshëm”, duke paralajmëruar se përpjekjet për parandalim po dështojnë, shërbimet mbështetëse janë të kufizuara dhe këshillat lokale e kanë gjithnjë e më të vështirë të sigurojnë strehim për ata që kanë nevojë.