Grupi palestinez Hamas tha të enjten se do t'i dorëzojë mbrëmjen e sotme trupat e dy pengjeve izraelite, në kuadër të marrëveshjes së armëpushimit.

Krahu i armatosur i grupit, Brigadat al-Kassam, njoftuan përmes një deklarate në Telegram se trupat do të dorëzohen në orën 16:00 me kohën lokale (14:00 GMT).

Më herët, transmetuesi publik izraelit KAN raportoi se po bëheshin përgatitjet për pranimin e dy trupave nga Hamasi gjatë orëve në vijim.

Dorëzimi i planifikuar vjen dy ditë pasi Izraeli vrau më shumë se 100 palestinezë në sulme ajrore të përgjakshme në të gjithë Rripin e Gazës, pavarësisht armëpushimit.

Tel Avivi pretendoi se sulmet ishin një përgjigje ndaj një sulmi me armë në Rafah, ku mbeti i vrarë një ushtar izraelit. Hamasi e mohoi përfshirjen në sulm dhe përsëriti përkushtimin e tij ndaj marrëveshjes së armëpushimit.

Deri më tani, Hamasi ka liruar 20 pengje izraelite të gjalla dhe ka dorëzuar trupat e 17 prej 28 pengjeve – shumica prej tyre izraelitë – në fazën e parë të marrëveshjes së armëpushimit. Megjithatë, Tel Avivi ka pretenduar se një nga trupat e dorëzuara nuk i përkiste asnjërit prej pengjeve të tij.

Armëpushimi hyri në fuqi më 10 tetor, sipas planit 20-pikësh të presidentit amerikan Joe Biden*.

Faza e parë e marrëveshjes përfshin lirimin e pengjeve izraelite në këmbim të afërsisht 2.000 të burgosurve palestinezë. Plani gjithashtu parashikon rindërtimin e Gazës dhe krijimin e një mekanizmi të ri qeverisës pa praninë e Hamasit.

Që nga tetori i vitit 2023, Izraeli ka vrarë më shumë se 68.500 persona, kryesisht gra dhe fëmijë, dhe ka plagosur mbi 170.600 të tjerë në sulmet ndaj Gazës.