Prindërit në Finlandë kanë nisur një fushatë kundër racizmit pasi Zeynep Falay - një nënë me origjinë turke me bazë në Helsinki - ngriti shqetësime në LinkedIn në lidhje me pranimin në rritje të gjuhës dhe simboleve raciste në shkollat finlandeze.
Falay shkroi postimin origjinal pasi dëgjoi nga fëmija i saj adoleshent për komentet raciste të konsideruara si shaka, simbolet që shfaqen në korridoret e shkollave dhe ngjitëset që shpërndahen. Ajo i nxiti prindërit e tjerë t'i pyesin fëmijët e tyre se çfarë shohin në shkollë dhe në internet, dhe çfarë ndodh kur dikush bën një shaka raciste.
Tre prindër ndanë shqetësimet e tyre në LinkedIn në lidhje me ndryshimin e qëndrimeve ndaj emigrantëve dhe grupeve minoritare. Dhjetëra njerëz i janë bashkuar fushatës që atëherë, raportoi transmetuesi publik finlandez Yle të mërkurën.
Falay tha se disa mësues i kishin thënë se kishin nevojë për mjete më të mira për t'u përgjigjur. Ajo i nxiti prindërit të flisnin me njëri-tjetrin dhe t'u kërkonin shkollave se çfarë po vëzhgonin dhe si po reagonin ndaj incidenteve të racizmit.
“Nëse e kundërshtojmë racizmin, duhet të marrim pjesë aktive edhe në krijimin e kulturës në të cilën duam që fëmijët tanë të rriten”, shkroi ajo.
Një prind tha për servisin publik finalendez Yle se fyerjet raciste tani toleroheshin më gjerësisht, duke shtuar se një gjuhë e tillë ishte gjithnjë e më e dukshme në hapësirat online të frekuentuara nga të rinjtë.
Një prind tjetër tha se dy adoleshentë kishin sulmuar fëmijën e saj tetëvjeçar ndërsa fëmija po kthehej me biçikletë nga shkolla në shtëpi.
“Këto gjëra nuk duhet të rrjedhin tek fëmijët”, tha ajo, duke shtuar se “racizmi në përgjithësi po bëhet gjithnjë e më i pranuar në gjithë shoqërinë”.
Racizmi onlajn
Studiuesit kanë paralajmëruar se retorika e ekstremit të djathtë mund të arrijë tek të rinjtë përmes shakave, memeve dhe ironisë.
“Shprehje të tilla mund t’i bëjnë idetë diskriminuese të duken të zakonshme, të pranueshme ose edhe argëtuese”, tha një studiues i psikologjisë sociale në Universitetin e Helsinkit.
Një anketë e Kryqit të Kuq Finlandez zbuloi se 95 për qind e të anketuarve të moshës 15 deri në 24 vjeç kishin përjetuar ose qenë dëshmitarë të racizmit onlajn. Veç kësaj, një studim nga Kolegji Universitar i Policisë në Finlandë zbuloi se numri i krimeve të dyshuara të urrejtjes, të raportuara në polici, ka arritur një nivel rekord për të tretin vit radhazi.
Shërbimi i Sigurisë dhe Inteligjencës i Finlandës ka paralajmëruar se platformat e medieve sociale po përdoren për të ndikuar dhe rekrutuar të rinjtë.
Ministria e Brendshme i tha transmetuesit Yle se policia po e monitoron këtë çështje dhe theksoi nevojën për të bashkëpunuar me shkollat dhe prindërit, me qëllim trajtimin e veprimtarisë ekstremiste.
